Ой да джёрме, аллай джёрме,
Быллай джёрме ой, ой,
Мени джёрмем аллай джёрме
Къаллай джёрме ой, ой.
Тыш чегиси джети арбагъа
Джиб болады ой, ой,
Ань. урлагъан дуниядан
Тюб болады ой, ой.
Мени джёрмем тас болгъанды,
Кёрюрмегиз ой, ой,
Ань. урларгъа ол сагъатха
Телимегиз ой, ой,
Аны ашаргъа ол сагъатха
Бёрюмегиз ой, ой.

Тау артындан аугъан эди малгар аскер,
Тау аллындан чыкъгъан эди зытчыу аскер.
Нёгерликге чийбыдырны джаратмалла,
Бара-барыб кылды кёпюрден ары атлалла.
Чийбыдыргъа бирер къамчи сермедиле,
Джашла барыб тау башына ёрледиле,
Ёрледиле, анда джёрме кёрмедиле.

Къуран окъуй турама, бала,
Аптиек окъуб сен башла.
Джюрегиме ауруу салгъалла,
Джулкъунуб тюшсюн ол къашла

Аягъымда чурукъла,
Джезден чюйленнген табаны.
Мени сюйгениме тийгеед
Ачы аурууну аманы.

Акъ тубанла ташха, таугъа бёлюндю
Аны ичинден бир джарыкъ атлы кёрюндю.
— Яраббин аллах, бу черкесли болур, таулу болур, -
Деб адамла алай айтдыла анга.
— Таулу болур, бухар бёркю барды,—
Деб айтдыла бир къаууму.
Алай болса да ол алай айтыб къычырды:
— Мени сюйгеним, ариу Бадина!
Келе эсенг джууукъ келчи къатыма,
Кишиге джукъ айтмазма,

Сазым (Саз — къыл къобузну бир тюрлюсю.) ойнай, саз ойнай,
Къалдым, Аллах хакъына.
Къылычымдан къан тамса да,
Тоймам къуран хакъына.

Къылычымдан къан тамыб,
Сен джюрюсенг джетерсе.
Кёкен терек мен болуб,
Джерге битсем не этерсе.

Кёкге басхыч салгъанма
Кёк булутланы чачаргъа.
Байрым кечеге болджал салгъанма
Байдыматны алыб къачаргъа.
Огъары ёзеннге баргъанма,
Мени миннген атым арымай.
Андан эсе къалыб кетгеем
Ариу Байдыматны танымай.
Ол башынгдагъы джаулугъунг,
Аны ортасында джибеги.

Ойра, ол ариу да Гокка, ол ариу да Гокка, тамам ариу Гокка,
Ой, Гокка дейле джугъутур эчкини маркъа улагъына,
Гокка дейле тойчу уланланы да джаш ийнагъына.
Ол ариу да Гокка, хан къонакъла келиб тюшелле тургъан къабагъынга,
Къобанны суулары, Гокка, белгиниб энелле чыммакъ тамагъынга,
Орус чииилятла (мийиктабан туфлийле), Гокка, къалай джарашыула эки аягъынга
Къызыл ингиликле, Гокка, къаллай аламатла эки джаягъынга,
Тауукъ джюджекле, Гокка, тизилишиб ётелле къынгыр балагъынгдан,
Къулакъ сыргъала, Гокка, къалай джарашыула эки къулагъынга.

Экинди бола кёлегими юсюме кийгенем,
Ашхам бола мен ат белине миннгенем.
Адамла джата, кеч бола келиб,
Ташкёпюр элине киргенем.

Кечеле узун, ах кюнле къысха,
Къалай чыгъайым мен тангнга дери?
Сеймеклик ачыу сынамагъанем
Мен ёмюрюмде да санга дери.

Джандетли болсун да ма Сюйюнчланы да Зарият
Этген ишинги да ма ушатмайды дунияда болгъан
Закон бла шериат.
Ой аллах айтса да мен эрге барлыкъ тюлме
Мени арбазыма да белги атларым а киргинчи,
Белги атыма да ёксюз къарнашчыгъым миннгинчи,
Бау аллы сабанны да белги ёгюзле бла сюргюнчю.
Ой мени анам, да мен эрге барлыкъ тюлме,
Мени джауум а бу ёге ананы сынасын,
О мени къ-анлым- да анасы ёлюб джыласын.

Ой анам, бир ариу да бала кёргенме,
Аны хапарын айтыргъа да саннга келгенме,
Аны да башына да джангыз джанымы да бергенме,
Ой анам, мен бу ариуну сюйгенме.
Кемисхан атадым мен аны джангы атына,
Ай, мен сюйгенлей да сен ариу бала сюймесенг,
Адам басмасын бир да сен баланы къатына.
Эртденбла эртде туруб къарайма
Тебердини башы мийик таулагъа,
Ёлгенле да бир сен ариуну алмазла,
Мен бермезме бу дунияда саулагъа.

Айджаякъ, ала джаулугъунг
Ариу джарашады бойнунга.
Мен сукъланама, ёлеме
Мамукъдан джумушакъ къойнунга.
Ой джылкъы анасы акъ байтал,
Ол къарышкъулакъ тай табар,
Тейри, сени анангы мен таный эдим,
Ол къалгъан къатынладан байхамбар.

Джанбаш сыртда джангыз терек битмесин,
Битсе битсин, ууалмасын, сынмасын,
Аналагъа джангыз улан туумасын,
Тууса туусун, аурумасын, ёлмесин,
Аны анасы аны ачыуун кёрмесин.

Хасан беш джыл джалчы болуб джашады,
Ол суу бла сууукъ гырджын ашады,
Беш джылны ол джалчылыкъны кётюрдю
Хозяин малы ючюн ёлтюрдю.

Абрек уланла Сынты-Къаласында, ойра, джашайла,
Байланы, бийлени ала къой аягъынлай ашайла.
Абрек джигитле чыкъдыла бу дуниягъа кёзюусюз,
Хадагъужукъ улун этелле минер атсыз, джегер ёгюзсюз.
Уллу Къарачайгъа орус патчахны закону салынды,
Ой Зукгу прустоп бёркюн алыб, юч ёзеннге джалынды.
Ой Зукгу прустоп, джамагъатны джыйыб, былай айтды:
- Тилейме, абрек уланланы ичигизге джыйыгъыз,
Гитче хаталары энди уллугъа тебрегенди,
Патчахыбыз эшитмесин, ариу айтыб тыйыгъыз!

Терек тюбюне къуюлуб къалгъанды
Къаншаубий баланы санлары.
Эшик аллында бир къазан къайнайд,
Ол ашаб тоймаз бал болуб,
Къаншаубийими алыб келелле
Тенгле арасында сал болуб.
Мени Къаншаубийим келлик болуред,
Тенгле арасында ал болуб
Экинчи кюнде алыб келдиле
Тенгле арасында сал болуб.

Ексюз болуб ёсген эдинг, Гапалау,
Кёб къыйынлыкъ кёрген эдинъ, Гапалау.
Къарыусузгъа нёгер эдинг, Гапалау,
Анасына джигит туугъан Гапалау.
Сен джарлылагъа таянчакъ болуученг,
Ала ючюн сёзню таукел салыученг.
Къарыусузлагъа сен кёпюр салыученг,
Анасына джигит туугъан Гапалау.

Огъары часткангда бир къайнаб чыкъгъан къара суу,
О къара сууда ала чабакъла ойнайла,
Акъыллы башынгда да бирер къазанла къайнайла.
Хаджини ийдиле ол уллу сюдню джолуна.
Къалай ышаннган эдинг Чокуна кибик къатын джууукъгъа,
Бойнум чыдамайды да Армаберде ачы сууукъгъа.
Не болгъанды, Туугъан, сени аман эки къолунга.

О Хаджи-Хаджи, да къайры бараса, джол болсун,
Джюрютген ишлеринг, Хаджи, сени башынга онг болсун.
Мени ийдиле Дагъыстаннга, джаным, къумукъгъа, деди
Бойнум чыдамайды Армаберде ургъан да къаты суукъгъа,
деди Къайдан ышандым а Чокуна — къатын джууукъгъа, деди
Не хатам бар эди Джаныуай да бокъ гыбытха,
Окъуб, дининг тийсин Джагъанасда ёсген къара чууутха.

Мен уста эдим къара атаргъа ышаннга,
Джалчы болгъан эдим Абайланы Хасаннга.
Бек джарай эдим мен, артыкъсыз да къой малгъа,
Джарашханем джарлылыкъдан беш джылгъа.
Хар къуллукъну тамам ол айтханча битдирдим,
Юч джюз Къойну кютюб минг къойгъа джетдирдим.

Къарасауут тыйыншлыды сырма кюмюшге,
Джалчы болдум Боташлань. Юнюсге.
Берги Гумгъа тебреген эдим оракъгъа,
Башым къалды Уллу Къарачайда джомакъгъа.
Биз кюз айлада тебреген эдик хайыргъа,
Къара кюнле келди Джагъайланы Майылгъа.
- Ой атам, джаным, мен санга хапар айтайым.
Кече джукълаб мен аллай бир тюш кёрдюм,
Башыбызгъа джарамагъан иш кёрдюм,
Бюгюн джолгъа чыкъмай джарлы юйюбюзде къалайыкъ.
— Айхай, къызым, джарлыгъа ишлемей кюн джокъду,
Баш кечиндиргенден сора анга юй джокъду.

Эбзелени джигит туугъан Къанамат,
Эки кёзюнгден сени джуууб къан агъад,
Этер эдинг санларынга бош болсанг,
Сени ургъан итле бла къазауат.
Джарыкъ джулдуз таугъа айланыб батады,
Ой, Учкуланда бир тулпар ёлюк джатады.
Чыкъгъан эдинг Сынты къабакъдан абрек,
Джети джылны Амгъата бойнун сакъладынг,
Джюрюдюнг кече бёрю, кюнюнг ит болуб,
Кийген кийиминг сирке болуб, бит болуб.