Абрек уланла Сынты-Къаласында, ойра, джашайла,
Байланы, бийлени ала къой аягъынлай ашайла.
Абрек джигитле чыкъдыла бу дуниягъа кёзюусюз,
Хадагъужукъ улун этелле минер атсыз, джегер ёгюзсюз.
Уллу Къарачайгъа орус патчахны закону салынды,
Ой Зукгу прустоп бёркюн алыб, юч ёзеннге джалынды.
Ой Зукгу прустоп, джамагъатны джыйыб, былай айтды:
- Тилейме, абрек уланланы ичигизге джыйыгъыз,
Гитче хаталары энди уллугъа тебрегенди,
Патчахыбыз эшитмесин, ариу айтыб тыйыгъыз!
Ой юч ёзенден юч келечи атланыб тебредиле:
- Эй, Тууга, Тууду, Къарачайгъа патчах аскер киргенди,
Зукгу прустоп бёркюн алыб, джамагъатха джалыныб,
Бизни бойнубузгъа бир аманат салыб ийгенди.
- 'Келигиз, джарашыгъыз, элими бири кибик кёрюрме,
Келигиз, сюйген сауутларыгъызны да берирме-деиди.
— Келдигиз эсе да кетигиз, ызыгъыздан джетербиз,
Зукгу прустопха барыб, кесибиз джууабын этербиз.
Салыб бардыла ол кюню ала Зукгу прустопну аллына.
Эй, адам къарамасын ол кюню джигит Тууганы бет къанына.
— Эй, абрек къарнашла, келигиз, джарашыгъыз,
Уллу Къарачайда бирер тёртгюл юй юлюш берейим,
Бюгюнден арысында кёлюпоз къалмазча,
Бу джуртлада мен сизни багъалы кёрейим.
Тууга: Чолакъ Бекмырза бизге оноу этеди,
Менме — дейди, джюйюсхан, сизни аллах джаратхан бийигиз..
Аслан, къаблан кибик къарнашларым анга къалай бой салсынла?
Энди Сынты-Къаласы болгъанды бизни туугъан юйюбюз.
Биз джашарыкъ тюлбюз бу тёгерекде
Хадагъужукъ улун кюрюч терекге къолубуз бла асмайын.
Биз ант этгенбиз, джашарыкъ тюйюлбюз,
Бу ючгюл дунияны, ууатмайын, чачмайын!
Абрек къарнашла сауут-саба эмда бой бермей,
Къайтдыла ол кюню мырды башы суулагъа,
Муну эштиб «Туу машалла» — деди джамагъат
Бу Сюйюнчланы джигит туугъан батыр Туугагъа!
Тууга къатыны ариу Айша окъа тигеди башлыкъгъа,
Къалай этейик бу кесин тыялмагъан джашлыкъгъа!
Чолакъ Бекмырза болмаз бизни бийибиз,
Сынты-Къаласыды бизни джашар юйюбюз.