Огъары часткангда бир къайнаб чыкъгъан къара суу,
О къара сууда ала чабакъла ойнайла,
Акъыллы башынгда да бирер къазанла къайнайла.
Хаджини ийдиле ол уллу сюдню джолуна.
Къалай ышаннган эдинг Чокуна кибик къатын джууукъгъа,
Бойнум чыдамайды да Армаберде ачы сууукъгъа.
Не болгъанды, Туугъан, сени аман эки къолунга.
Ой салам болсун Байчораланы, не этейим
О Нанак бла Эсен да хаджиге.
О мен айландым, Хаджини аман джолуна,
Кёбле къууаналла Хаджини да джойгъан джолуна.
Ой, юйюнгю башына келиб къарылгъачла, кёгюрчюнле къоналла,
Хасан, Хусейн — ала бир сатылыб туралла.
О мени кюрешгеним атамдан къалгъан джер ючюн тюйюлдю,
О мени кюрешгеним джашагъан элим ючюндю.
Къатынынг Кябахан джанынга ырыслаб джыламайды,
Келининг Меккяхан сарынла, кюуле салыб джылайды,
Эгечинг Джанымхан акъылындан энтда чыгъады.