О Хаджи-Хаджи, да къайры бараса, джол болсун,
Джюрютген ишлеринг, Хаджи, сени башынга онг болсун.
Мени ийдиле Дагъыстаннга, джаным, къумукъгъа, деди
Бойнум чыдамайды Армаберде ургъан да къаты суукъгъа,
деди Къайдан ышандым а Чокуна — къатын джууукъгъа, деди
Не хатам бар эди Джаныуай да бокъ гыбытха,
Окъуб, дининг тийсин Джагъанасда ёсген къара чууутха.
Былаймыды, Хаджи, джырынгы да эжиую,
Энтда келир биягъы итлени да кёзюую, деди.
Айда суу алгъанды, джашла, джаным, Тебердини да кёпюрюн, деди
О джоюб ийдиле да, джаным, джарлыланы да ёкюлюн.
Мени ишим тюшдю да патчахны джанында санатха,
О салам болсун а къарнашларым Эсен бла Нанакга,
Мени башым къалды, джашла, джарлыла амалтын, палахха.
Джоюб иер кибик а мени элге этген хатам джокъ,
Тартыб алыргъа, джашла, ай да бурун кибик атам джокъ.
А хатам бар эсе да тюбетигиз хатама,
Таукеллигим ушайды мени да атама — деди.
Эгечинг Джанымхан джанынга ырыслаб джыламайд,
Къумукълу улу Окъуб, гяур, сени приговорунга къол салыргъа унамайд.
Огъары джанынгда да сени чыкъгъан къара суу,
Джаным, къара сууда ала чабакъла ойнайла,
Акъыллы башынгда да, Хаджи, къан къазанла къайнайла.
Ой, сен харибни джаула джашаргъа къоймайла.