Эбзелени джигит туугъан Къанамат,
Эки кёзюнгден сени джуууб къан агъад,
Этер эдинг санларынга бош болсанг,
Сени ургъан итле бла къазауат.
Джарыкъ джулдуз таугъа айланыб батады,
Ой, Учкуланда бир тулпар ёлюк джатады.
Чыкъгъан эдинг Сынты къабакъдан абрек,
Джети джылны Амгъата бойнун сакъладынг,
Джюрюдюнг кече бёрю, кюнюнг ит болуб,
Кийген кийиминг сирке болуб, бит болуб.
Джети джылны Амгъата бойнун сакъладынг,
Кийикле ёлтюрюб таулада этле къакъладынг.
— Къасбот, къарнашым, ёлюр тюшюбюзню кёргенме,
Кесим джангыз къымыжа болуб кёргенме.
— Къоркъма, Къанамат, адам кёрмез тюш джокъду,
Да бизни кибик эрле тюшмез иш джокъду.
— Кел, Къасбот, биз былай этиб турмайыкъ,
Дженгил огъуна биз Къарачайгъа барайыкъ,
Къонакъбайны Хубий улуна салайыкъ.
Биз баргъанек Абул-Керигме къонакъгъа,
Абул-Керим бизни къонакъ кибик кёрмеди,
Кёрмесе да тахсабызны итлеге бермеди,
— Толу кюнню къонакъ юйюнде джашырды,
Экинчи кюн бизни ариу айтыб ашырды:
— Орус мени энди ариу кёрмейди,
Джазгъан къагъытыма къолай джууаб бермейди.
Гюллю улу Хаджи-Бекирни джаны кибик кёреди,
Джазгъан къагъытына уллу акъыл бёледи.
Биз баргъан эдик ой Учкуланнга къонакъгъа,
Салыб тюшдюк Гюллю улу деген къанаугъа.
Бизни кёргенлей ол гинджи кибик кийинди,
«Хош келдинг, Къанамат» — деб, гюлкю кибик сюйюндю.
Алай баргъанлай бизни къонакъ юйге салгъанед,
Хыйла бла еауутларыбызны къолубуздан алгъанед.
Кечесинде таглы хантладан тойдурду,
Кюндюзюнде ма къара къойлай сойдурду.
— Мен барайым да къагъыт, къалам алайым
Сеннге, Къанамат, ариу къагъыт джазайым.
Киши кёрмезча сени деменгили джашырайым,
Паспорт алыб сизни тюрк патчахха ашырайым.
Алай айтыб ол бизни къоюб кетгенед,
Эшиклерибизни тышындан къылыч этгенед,
Мычымайын Ачау улу старшинагъа джетгенед,
«Кийикле тутдум» деб, къууаныб хапар этгенед.
Старшина элден уллу къарыу алгъанды,
Къанамат тургъан юйню тёгерегин канвой алгъанды.
Дауурланы эшитиб Къанамат терезеге башын салгъанды.
- Къасбот — деди, ой бизге болур болгъанды,
Тёгерегибиз къара чаукадан толгъанды,
Ай, Къасбот, керти болду бизни тюшюбюз,
Къолай болмады бизни къонакъбайда ишибиз.
Тогъуз окъ тийгенди, Къанамат, сени башынга,
Къара кюнле келди Алийни джигит джашына.
Не болгъанды белингде къара къамагъа?
Мыйынг чачылды юйде эшик къангагъа.
Протоколунгу къанынг бла джазалла,
Къабырынгы да Къара багъанада къазалла.
Эбзеланы тулпар туугъан Къанамат,
Къабыргъангда барды артыкъ иегинг,
Сени къанынгы бу,итлеге къурутмаз,
Артынгда къалгъан сынгар улан сюегинг.
Джаргъан докторла сени башынгы сылайла,
Тиширыула тюрсюнюнге къараб джылайла.
Амгъатада талай джылны джашадынг,
Марал, кийик териледен къош этиб.
Нтден туугъан Гюллу улуна нек ышандынг,
Уллу кёллю болдунг, джанынгы бош этиб.
Учкуланда мурдар итле джашайла,
Уялмайла, адам этле ашайла.
Къочхар улу Къанаматны ёлтюрюб,
Патчахдан чын, саугъа, ашау алады,
Мурдарлыгъы ючюн медаль тагъады.
Елдю, кетди Эбзеланы Къанамат,
Тулпарлыгъынг арт кюнюнге джарамад.
Дунияда сенден джарлы ким болур?
Эгечинг джокъ кёзлеринги джумаргъа,
Ананг джокъду ёлюгюнге джыларгъа,
Атанг джокъду ысхатынгы къураргъа,
Къарнашларынг ушайдыла тууаргъа.
Ма кёрдюгюзмю Хаджибекирни этген итлигин
Хаджи-Умар, ала бар сойгъан кийигинги джиблигин.