Къарасауут тыйыншлыды сырма кюмюшге,
Джалчы болдум Боташлань. Юнюсге.
Берги Гумгъа тебреген эдим оракъгъа,
Башым къалды Уллу Къарачайда джомакъгъа.
Биз кюз айлада тебреген эдик хайыргъа,
Къара кюнле келди Джагъайланы Майылгъа.
- Ой атам, джаным, мен санга хапар айтайым.
Кече джукълаб мен аллай бир тюш кёрдюм,
Башыбызгъа джарамагъан иш кёрдюм,
Бюгюн джолгъа чыкъмай джарлы юйюбюзде къалайыкъ.
— Айхай, къызым, джарлыгъа ишлемей кюн джокъду,
Баш кечиндиргенден сора анга юй джокъду.
Биз бара эдик бир арбагъа джыйылыб,
Ой, кетген эдик уллу Къобаннга къуюлуб.
Ёгюзлени кёзю къыймай, берди бизге
Юренмеген эки эмилик уанык,
Биз тебреген эдик баш кечиндирирге къууаныб.
Бара-барыб биз Къобан шоркъалагъа къуюлдукъ,
Юнюс Хаджиге келгеед кетмез къыйынлыкъ.
Къобан суу бир тенгиз болду, терк болду,
Ол ариу Сюйюмию анда джашар кюню кёб болду.
Ёгюзлерибиз бир шайтан болду, джек болду,
Бизни арабызда дауур, къычырыкъ кёб болду.
- Атам Майыл нек къутургъаиды билмейме,
Алты башлы юйдегисин Къобаннга къуяргъа,
Тоноуубузну сюймегеиле джыяргъа.
Эзиу тюймелеринги анда хур джашла тешелле,
Къутас чачынгы ой суу шандыкла эмелле.
Ариу Сюйюм джакын берди суу тюбюнде термилиб,
Адетде ёлмеди келин отоулада керилиб.
Суу сюердинле ариу суратынгы марайла,
Джан чачларынгы агъач таракъла тарайла.
— Бармайыкъ, — деед ишни къолайсызлыгъын ангылаб,
Осият этеед суу шындыклагъа тынгылаб.
Амал болмады бир-бирибизни кёрюрге,
Кишибиз къалмады схатыбызны берирге.
Сууну тюбюнде эрши джаныуарла джашайла.
Елюклерибизни анда суу балыкъла ашайла.
Тебреген эдик тар ёзенден, тауладан,
Элибиз унутмасын бизге джетген къыйынлыкъны.