Ой анам, бир ариу да бала кёргенме,
Аны хапарын айтыргъа да саннга келгенме,
Аны да башына да джангыз джанымы да бергенме,
Ой анам, мен бу ариуну сюйгенме.
Кемисхан атадым мен аны джангы атына,
Ай, мен сюйгенлей да сен ариу бала сюймесенг,
Адам басмасын бир да сен баланы къатына.
Эртденбла эртде туруб къарайма
Тебердини башы мийик таулагъа,
Ёлгенле да бир сен ариуну алмазла,
Мен бермезме бу дунияда саулагъа.
Ой, айтхан сёзюнгю бир сен ариуну джарасы бар
Ой, джюрегимде мени джангыз ёсген тамыргъа да, деди
Саулай джамагъат джыйылыб джаназы къылсынла,
Кемисханым а мени тутуб салсын къабыргъа да, деди.
Ой чабакъ болуб къара тенгизледе кетиб баргъаем,
Сени амалтын дунияда джарлы нек болдум,
Мындан эсе джаным джаратылмай къалгъаед.
Ой анам, мен Петербургга барлыкъма,
Кемисханнга кёб алтын саугъа аллыкъма.
Ой анам, Петербургга барсам а
Кемисханнга да бир алтын саугъа иерме.
Ёлюб джер тюбюне, анам, мен тюшсем,
Къабырда сюеклерим сени къоймай сюерле.
Ой кёкде учхан болур анам къарылгъач,
Къанатчыгъын уча келиб къакъды чалманнга.
Кемисханым ауруйду, ёледи десегиз,
Джанымы джояр эдим, артха турмай, дарманнга.
Ой да бу Чокъай миннген ат бу сары аджир, деди
Ой Доттау миннген да барды энтда джаным тору аджир а.
Биз аланы да Ат чабханда чарсха иейик,
Экибиз бирге да тёзмей муну да сюебиз,
Ой ким хорласа да экибиз бирден сюейик.
Ай, гяур къанчыкъны да къалай кётенли этгенди,
Ай, бармагъына да бир алтын джюзюк ишлетиб.
Манга келмесенг сени болуунгу да кёрейим,
Арбазынгда да къынгырбоюн атла кишнетиб.
Ой да анам а муну джырын джырлайма,
Эки джаягъымы да табу арытыб,
Сен тойгъа кирсенг тойну толгъан айлай джарытыб.
Ол арт сынынгдан бир ариу да болуб бараса,
Ай кюмюшчюле да бир кюмюш таякъ джоннганлай,
Кюмюшчюле да бир кюмюш форма къуйгъанлай.
Акъ ёшюнюнгде да бир эки затчыкъ кёреме,
Акъ къаягъа да бир кёгюрчюнле къоннганлай,
Эки кёзюнг ушайды челек сютге дугъум атханлай.
Орунда джатыуунг а бир сен ариуну ушайды
Джугъутур эчки да къаягъа кириб джатханлай,
Ой, эки къашынг а бир сен баланы ушайды
Ой акъ къагъытха да бир къара къалам тартханлай.
Ой, ол кюн бетде, табу, энишге
Аллыгъыздагъы ташлы джол бла,
Ах сюйюб келсенг, мен сен ариуну аллыкъма,
Ай сюймез болсанг а мен сени алмайма зор бла.
Къайтыб келирми да да эки кетген айыбыз,
Къайтыб келирми да да ётюб кетген джайыбыз.
Энтда чыгъармы да бизни бюгюн батхан, кюнюбюз,
Ой, къайтыб келирми да бизни быйыл кетген кюзюбюз.
Ой, анам, мен бу ариуну сюйгенме,
Къалай тентек да болуб а къалгъанма,
Кавказияда да къызыл а винону ичгенча,
Ай да, анам, сен муну меннге алсанг а,
Келинлик этер да туура кёлюнг бла бичгенча.
Ай анам а, юйюмю башы кёк къанджал,
Ол кёк къанджалгъа да келиб къарылгъачла къоналла
Эй, ариучугъум, бетингде нюрюнг къайдады деб,
Ой сени амалтын тенглерим бир кёб соралла.