Джанбаш сыртда джангыз терек битмесин,
Битсе битсин, ууалмасын, сынмасын,
Аналагъа джангыз улан туумасын,
Тууса туусун, аурумасын, ёлмесин,
Аны анасы аны ачыуун кёрмесин.

Хасан беш джыл джалчы болуб джашады,
Ол суу бла сууукъ гырджын ашады,
Беш джылны ол джалчылыкъны кётюрдю
Хозяин малы ючюн ёлтюрдю.

Къама кирди къолтугъуну кенгинден,
Къан агъады чебгенини дженгинден,
Чыкъгъан эди Джанбаш сыртха мал бла,
Тигелейди Джанбаш сыртдан сал бла.

Къан кюнле келгендиле Хасаннга,
Сууукъ къуугъун барады уллу Басханнга.
Ёлтюргенле барадыла къачаргъа,
Мурат этелле джалчы рысхынгы чачаргъа.

Беш джылны мен джалчылыкъда айландым,
Кече бёрю болуб, кюндюз ит болуб,
Джанбаш сыртда къама кириб сойландым,
Мен барама зор дуниядаи тас болуб.

Хасан чыкъды аман кюнде джалпакъгъа,
Осият этед Даумхан этген къалпакъгъа,
Аны малларын дорхха уруб сатдыла,
Кюмюш къамасын залогга салыб тартдыла.

Тулпар Хасан ёлюб, сынла сыртында джатады,
Къаны саркъад кёк кырдыкны толтуруб,
Сюйген къызы ариу Даумхан джылайды,
Джар башында кёк кырдыкга олтуруб.

Хасан ёлдю, Даумханны чакъыра,
Къойлары къалды ызындан макъыра,
Тууралгъан санла сырт башында солуйла,
Итлери уа тёгерегинде улуйла.

Джаш тенглери къуугъунуна келелле,
Джалчы уланла бий-бай къолдан ёлелле,
Джалчы джюрюр джалчылыкъ джол бла
Байла абдез аладыла къан бла.

Белингдеги маузер гёрохунгу
Эбзе тагъыб келгенди,
Ёмюрюм тауусулмаз деучененг да
Ёлген хапарынг келгенди.

Джан береди туплар Хасан кериле,
Ёлюб барады Даумханнга термиле,
Тулпар Хасан ёлдю, энди ол джатар,
Дауумханнга не хатагъа танг атар.