Терек тюбюне къуюлуб къалгъанды
Къаншаубий баланы санлары.
Эшик аллында бир къазан къайнайд,
Ол ашаб тоймаз бал болуб,
Къаншаубийими алыб келелле
Тенгле арасында сал болуб.
Мени Къаншаубийим келлик болуред,
Тенгле арасында ал болуб
Экинчи кюнде алыб келдиле
Тенгле арасында сал болуб.
Анам, Къаншаубий ой сабий бала,
Сени бёрюлей улутхан.
Доммайны башы ол худжу тала,
Къаншаубий, юйюнгю къурутхан.
Агъач кесерге барлыкъ болмазенг,
Ол чыбчыкъ ётмез тау болса.
Мени къаншаубийим келлик болуред,
Тенгле арасында сау болса.
Эгечлеринги иерге унамайла,
Ол чыпчыкъ ётмез тауду деб.
Адамла мени алдаб туралла,
Сени Къаншаубийинг сауду деб.
Мен Къанша/бийге баргъынчы, анам
Былай боллу'гъуму билгенем.
Кече арасында къымыжа болуб,
Бир къара джамчы кийгенем.
Къартчыгъала мекям салалла
Юйюнгю артында чалдыгъа.
Ма экибизни айтала, Къаншаубий
Тийре къатынла къаргъышда.
Къаншаубий балагъа ушайды, мен джарлы
Кийизчигими аласы.
Ой менлей джарлы болуб къалгъаед
Мени джаууму баласы.

Ой къолумдагъы мени къумгъаным,
Суу къуйгъанлыкъгъа толмагъан.
Ой менден джарлы ким болур, анам
Этген мураты толмагъан.

Кийимлерими джуууб джайгъанма,
Эртден аяз къурутур.
Адамла манга алай айталла
Джашды, сабийди, унутур.

Кюнюм кюнледен къарангы болад,
Башымы джуууб тарасам.
Эки кёзюм къызыл къан кёред
Доммайны башына къарасам.

Кече тюшюмде алай кёргенем,
Джалан аякъ болуб, юч атлаб.
Мени Къаншаубийим келеди, ой анам,
Худжу сал агъачны къучакълаб.