Экинди бола кёлегими юсюме кийгенем,
Ашхам бола мен ат белине миннгенем.
Адамла джата, кеч бола келиб,
Ташкёпюр элине киргенем.

Кечеле узун, ах кюнле къысха,
Къалай чыгъайым мен тангнга дери?
Сеймеклик ачыу сынамагъанем
Мен ёмюрюмде да санга дери.

Мен баргъан эдим уллу Тебердиден
Ташкёпюр элине къонакъгъа,
Башым а къалгъанды, ах мен джарлыны
Бир таурух бла джомакъгъа.

Теберди аягъына биз да джетгенлей,
Бир бёлек атлы кёрюндю,
Аланы кёргенлей сабий акъылым
Ой ташха, таугъа бёлюндю.

Алларында келген ана къарнашым,
Ол мени сарнатды, улутду,
Шыбыла кибик джетиб ургъанлай,
Сау санларымы къурутду.

Андан келеенг, мурдар, къан ичген,
Бёлек атлыгъа ал болуб,
Мындан къайтхаенг кёсеу болуб,
Миннген атынга сал болуб.

Ат къамчиле чулгъаныб тиелле
Чыбыкъдан ингичге белиме,
Къайтарыб алыб баралла
Мени чыгъыб келген элиме.

Къулду дейдиле, мени къоймайла,
Ах сюйюб келген эриме.
Мен келген эдим сюйюб джашаргъа
Ах къургъакълагъа келиннге.
Мени къарнашларым салдыла мени
Кёзюусюз къыйын ёлюмге.

Кечеле узун, ах кюнле къысха,
Атдыралмайма тангымы,
Сенден сюйгеним бар эсе,
Рамазан Тёгейим джюрек къанымы.

Бу меннге джетген зорлукъгъа
Тюз адамла къарайла
Атны юсюнден акъгъан къанымы,
Ах, калак итле джалайла.

Къамчиле къаралтхан мени мор санларым
Отха тюшгенча кюелле,
Тукъум бет джойгъан, уялмаз деб,
Къамчиле бла тюелле.

Джарыла, джылай, ах, мен джарлыны,
Къайтарыб, алыб бардыла,
Къанлы Къачханны юсюне элтиб,
Кесими джангыз салдыла.
Кемеле келелле бир къайыкълагъа джанаша
Аланы ичинде кетерик болур,
Мени джаным сюйген бир паша,
Мен ёлюб, кетиб барама, джаным,
Энди мени орнума сен джаша.

Кесими джангыз, карантин этиб,
Къатыма киши къоймайын,
Тохдарыкъ тюлдю бу къанлы Къачхан,
Мени къанымдан тоймайын.

Аш орнуна, ах мен джазыкъгъа,
Елюр отну бердиле,
Сабий санларымы къатдырыб мени,
Ах орундукъгъа кердиле.

Ой къан къусама, анам, мен джарлы,
Ах, къара джерни къызартыб,
Джанымы береме ариу санларымы
Мен орундукъгъа узатыб.

Къамчиле тийген санларымдан
Тынч джаталмайма керилиб,
Энди ёлюб, кетиб барама, джаным,
Рамазан, сеннге термилиб.