Ойра, ол ариу да Гокка, ол ариу да Гокка, тамам ариу Гокка,
Ой, Гокка дейле джугъутур эчкини маркъа улагъына,
Гокка дейле тойчу уланланы да джаш ийнагъына.
Ол ариу да Гокка, хан къонакъла келиб тюшелле тургъан къабагъынга,
Къобанны суулары, Гокка, белгиниб энелле чыммакъ тамагъынга,
Орус чииилятла (мийиктабан туфлийле), Гокка, къалай джарашыула эки аягъынга
Къызыл ингиликле, Гокка, къаллай аламатла эки джаягъынга,
Тауукъ джюджекле, Гокка, тизилишиб ётелле къынгыр балагъынгдан,
Къулакъ сыргъала, Гокка, къалай джарашыула эки къулагъынга.
Гокка дейле къара тенгизлени ала чабагъына.
Ол ариу Гокка, терс къобузланы ач бёрюлей да улутхан,
Ой токъ санланы, Гокка, къамишле кибик къурутхан да, Гокка,
Джангыз бир кечеге да тогъуз келечини да сууутхан да Гокка.
Ол ариу да Гокка туугъан кечеледе, ол туугъан кюнледе
Шам Тебердиге да, джаным, тейри эшикле ачылды да, Гокка,
Ол ариу Гокка да дуния джарыкъгъа да чыкъгъан сагъатлада
Уллу Тебердиге да ой зем-зем суула чачылды да, Гокка.