Кёкге басхыч салгъанма
Кёк булутланы чачаргъа.
Байрым кечеге болджал салгъанма
Байдыматны алыб къачаргъа.
Огъары ёзеннге баргъанма,
Мени миннген атым арымай.
Андан эсе къалыб кетгеем
Ариу Байдыматны танымай.
Ол башынгдагъы джаулугъунг,
Аны ортасында джибеги.
Ариу Байдыматха неле айталла
Джумарыкъ тауукъну джюджеги.
Кямар ишлете турама
Гитче эгешчигим Зубайгъа.
Меннге келмесенг джазыуунг болсун
Сосуркъаны джашы Къулайгъа.
Ой кёкде баргъан джангыз къаз,
Ой суу ызында багъыр таз,
Ой сыйлы аллах, сенден тилейме
Ариу Байдыматны манга джаз.
Джюрюгюз, аланла, барайыкъ,
Тау агъачлагъа къарайыкъ.
Тамадаларыбыз барды деб
Къатынсыз къалай къалайыкъ.
Джалан аякъ чартлаб чыкъгъанма
Эшик аллында къырдышха.
Менден къалсанг джазыуунг болсун
Ма Орусланы Дыдышха.
Заказ бериб тери ийлетеме
Мен атымдагъы айылгъа.
Менден къалсанг джазыуунг болсун
Ол Тамбийланы Майылгъа.
Алтын тогъай саллыкъма
Миннген атыма нохтагъа.
Менден къалсанг джазыуунг болсун
Ой Алботланы Сохтагъа.
Джалан аякъ чабыб чыкъгъанма
Юйюбюзню аллы къыраугъа.
Меннге келмесенг, джазыуунг болсун
Тотуркъулланы Гыраугъа
Ой окъуй-окъуй мен турсам,
Мен Илиясны джетерме.
Ариу Байдыматчыкъны алыб келирем,
Томай урушса уа не этерме?
Ой башыбызда айыбыз,
Ол толмагъанлай, джартылай.
Ызындан къараб къалгъанма,
Мен сагъат кибик къалтырай.
Ой башыбызда айыбыз,
Ол алай ариу тёгерек.
Сени амалтын болгъанма
Юйюбюзден чыкъгъан абрек.
Ой тюбюмдеги тору ат,
Къара чилледен джалы бар.
Мен сюйгеними аллыкъма
Манга кимни дауу бар.
Темир бетли чебген тикдирликме,
Ой, субай ёсген саныма.
Ой ачыу болуб бир бек къаргъадым,
Къурман болайым джанынга.
Ол тюбюмдеги тору атым,
Ол джюрюмейди чабмайын.
Сен да къалыб кетме, джаным,
Мени дунияда табмайын.