Ой, сабий Баракъ, джаш Баракъ,
Сылпагъарлада баш Баракъ,
Дуниядан болуб кетди тас Баракъ.
— Джашлыгъымда сохталыкъда джюрюдюм,
Онбеш джылым толу джетген заманда
Абуклагъа джылкъы джалгъа киргенем.
Киргенликге адам кибик кёрмелле,
Къыйынымы ала манга бермелле.
Кеб заманны тарыгъыб, таралыб джюрюдюм,
Бир тынчлыкълы орунда джатмайын,
Мыдахлыкъ басыб тохдадым,
Бир да закон, сюд табмайын.

(Чымыкланы Чакъгъан деб тулпар ат болгъанды)
Сени анангы ючлю болуб мен табха эдим,
Андан эсе бу къара джерни мен къабха эдим.
Клиса къагъылса, орус индекледе къоян кибик бугъуучу,
Джауланы аллына ёхтемлениб пырх-чырх эте чыгъыучу.
Нелер айтасыз бу Чымыкланы Чакъгъаннга,
Тик ёргеге джюз джыйырма пудну тартханнга.

О, къюш къулакълы, къошун туякълы къара атым!
- Сен ёлгенли сыннганды мени къанатым.
Орус индекледен ма къоян кибик ётюучю,
Чакъыргъан джериме бир адам кибик джетиучю,
Тайлыгъынгдан сылаб-сыйпаб ёсдюрдюм,
Сени къуйругъунгу ашыкъ башынгдан кесдирдим.

О Къазий улу да бир батыр туугъан Басханукъ,
Ой эчкилеринг бир сюрюучюсюз келелле,
Зыбырыкъ кириб, джаным, ала ёлелле.
Ойра Къазий улу джигит Басханукъ,
Абадан эркечинги аты Дыгылмай,
Ай сау джюрюгюн бу къаялада, джыгъылмай,
Абадан эчкинги аты Эмиргенд дейле,
Тауукъ башланы бир бычакъсызлай кемирген.

Эчкибашланы да бир джигит туугъан Домалай,
Сен тура эдинг бу Нарсанада бий кибик,
Эртден бла да джылтыраб чыкъгъан кюн кибик,
Кетиб бараса бир кёмюр кибик, кюл кибик.
Нарсанада да бир ашай-иче тураенг,
Ай Гапполаны да бир Ойдур келди юсюнге,
Ах, мени джауум бир аман кёрсюн тюшюнде.
О кече санга салыб келген а
Гапполаны бу итден туугъан Ойдурду,
Чыгъара барды да къанлы тенглеге сойдурду,

Бийдир а Джабогъа туугъан эди эки ул,
Тамадасына бир хомух Къайсын атадыла,
Кичисине джигит Бекмырза - дейдиле.
Джигит Бекмырза анасындан туугъан кюнюнде,
Ол эр киндигин къыбылагъа айланыб кесдирди,
Эр кийимлерин тюз тобугъундан бичдирди.
Аны онбеш джылы толу джетген кюнюнде,
Атасы Джабогъа ол онбеш джесир тюшюрдю,
Анасы Къымсагъа дарий тобла тешдирди.

Мен тура эдим къошумда,
Ёлтюрдюле да ой мен джарлыны бошуна, дедим.
Джастыгъымдан а о къара шайтан къычырды.
Секириб туруб да мен ат орнума къарадым,
Ат орунда'уа ой атларымы кёрмедим.
Ызыма айланыб а темир сенегими сермедим,
Мычымайын а мен аджирими джерледим,
Узаймайын а мен ызларындан тебредим,
Ой кёб бармайын а бир къаранчхала тергедим.

Кече джукълаб тургъанлай,
Бир аман тюшле кёргенме,
Малчы къошха къызылбекле
Келгенлерин билгенме.
Умут этдиле Къабартыгъа
Къаудан къошну сюрюрге,
Ышанмалла, бек сюйдюле
Келиб хапар билирге.

Кюз къойчула Узун къолгъа кирдиле,
Малгарлыла бла хоншу джашайек,
Келе-бара тахсабызны билдиле,
Къобанланы къой бёлекни сюрдюле.
Къарачайгъа ачы къуугъун ийдиле,
Къой къуугъунну бизге этген ким болду?
Голаланы Оразайны къонгурау тамагъы.

Ай аман джашла, ёзен ишде къалгъан эдик бёлек джаш,
Ёзен ишни ишлей кетдик да эки юлешдик.
Узун къолдан ачы-ачы къуугъунла келгенед,
Къанлыланы джетиб джан аямай кюрешдик...
Ай аман джашла, биз чыкъгъан эдик алты атлы,
Джетишген кюн тамам керти джан татлы,
Миннген атларыбыз учхан къушдан къанатлы.

Загъыштокъ улу джигит туугъан Чёпеллеу,
Неге тынчаймайса, нечик тынмайса,
Энди меннге тынчлыкъ бир да бермейсе, деди,
Ай да мени бурун кибик кёрмейсе.
Гюбюнге джайгъанма дарий, къанауат,
Сени джанынг сыйлы аллахха аманат,
Энди неге тынчаймайса, тынмайса деди.
Юсюнге джайгъанма дарий джууургъан,
Нек къоркъаса, болур аллах буюргъан.

Батыр Басханукъ уллу да Бызынгыда бий эди,
Ой темир терек аны да о къаласына чюй эди
Батыр Басханукъ, джаным, уллу Бызынгыгъа да о бий болмаз,
Ой темир терек а аны да о къаласына чюй болмаз.
Батыр Басханукъну да, джаным, джар башында да къаласы,
Тау эллеге бий болалмаз обур атанг
Сылыуну о джаман баласы.

Къанлы Мурдухдан къойланы кюте бардым Бабагъа,
Джандетлени джети эшиги ачыкъ болсун
Бу Джандарны бизге табхан анагъа.
Ит тамлыла алгъан элле джарлы Джандарны арагъа,
Кийиз бушдукъланы чулгъаб салалла
Джарлы Джандар кезлик бычакъ бла салгъан джарагъа,
Кезлик бычакъ саналмайды къамагъа.
Къоян ызлаб буу тутду Рыстау Байрамны ызчы эгери,
Аман кюнде къачыб кетгенди джарлы Джандарны
Юч ёзенден сайлаб алгъан нёгерн.
Къачма, къачма, хомух туугъан Юсеин,
Сабийлени салгъанбыз киши кирмез мийик раннга,
Тюз туруман экибиз этген къралгъа.

О Джандар, Джандар, джанынг барсын кябагъа
Сатанай бийче да, ой тюшге эди арагъа.
Тамлыла джыйылдыла, ой, Гудух башы Лабагъа,
Къан чачылды да, ой, Гудух башы Лабагъа, дедим.
Ой бёлек къойну да кюн ортагъа сюре келгенем,
Амырхан улу да тамадабыз эди Хусей дедим а.
Эй тамлыланы мен Гудух башында кёргенме,
Кел, кесибизни бегитейик, биз а къазауат этейик, дегенме.
Амырхан улу Хусейин алай айтханды:
— Болалмайма мен а тейри сора кетмейин,

Джауумла джауалла тау джалпакълагъа, кёллеге,
Къуугъун келгенди Къарачайда эллеге.
Ныхытны башында сюеледиле юч къурукъ,
Дуут аягъындан чыкъды ачы къуугъун, къычырыкъ,
Бир къауум джетди Къарачайгъа ычхыныб,
Анда болур Батда улу батыр Татаркъан,
Джетишген кюн алады ол керти къан.
Экинчиси Мука улу омакъ Байчагъар,
Къылычындан къызыл ала къан агъар.
Татаркъан бизден артыкъ не этеди?
Джау кёрсек а аллыбызгъа салабыз,
Джаугъа джетсек, къаныбызны алабыз.

Юсюнгдеги къапталынг
Итиу бла ургъанлай.
Юсюнге барыб къалгъаем
Къазауат эте тургъанлай.

Джашлагъа къаптал этгенме
Краснаны морундан.
Джашланы аллах сакъласын
Японияны зорундан.

Биз тебредик Къарачайдан
Янон къазауатха сатылыб,
Япон къазауатында тебреди
Юсюбюзге къара тобла атылыб.
Къралыбыз къара къаннга батылыб,
Биз миналмайбыз Порт Артур таулагъа.
Башыбыз къалгъанды
Бу гяуур Японда джаулагъа.

Джангурла джауалла,
Кёкде булутла къаралыб.
Аскер чьткъгъанды,
Уллу Къарачайдан саналыб.

Джашла баралла
Темир машинагъа къаланыб.
Анала къалалла
Аланы ызындан таралыб.

Стампулчула Стампулгъа кетдиле,
Мында къалгъанлагъа ие къыйынлыкъла джетдиле,
Ол кюнледе бизге болур болгъанды,
Акъ бетледен къызыл нюрле онгнганды,
Бизни элибиз къолан худийледен толгъанды.
Ол кюнле машхарланы кюнюдю,
Аллай къотурбашны джети джаханим юйюдю.
Джылау болду Тебердини уллу тойлары,
Мангырай къалды Гата къыйынлыны
Буу Ёлгенде къойлары.