Загъыштокъ улу джигит туугъан Чёпеллеу,
Неге тынчаймайса, нечик тынмайса,
Энди меннге тынчлыкъ бир да бермейсе, деди,
Ай да мени бурун кибик кёрмейсе.
Гюбюнге джайгъанма дарий, къанауат,
Сени джанынг сыйлы аллахха аманат,
Энди неге тынчаймайса, тынмайса деди.
Юсюнге джайгъанма дарий джууургъан,
Нек къоркъаса, болур аллах буюргъан.
Башынга да салгъанма, джаным, къуу джастыкъ,
Къучакълашыб, джаным, ариу тынч джатдыкъ,
Энтда неге тынчаймайса, тынмайса?
— Къайдан тынчаяйым, къалай тынайым дейди,
Кёлюме келелле тюрлю оноула,
Кёзюме кёрюнелле алтын-кюмюш тоноула, дейди
Загъыштокъ улу да джигит Чёпеллеу.
Турчу, бийче, лампаны джандырчы,
От джагъаны да баллы хантдан алдырчы.
Турду бийче лампаны джандырды дейди,
От джагъаны да бир ариу хантдан алдырды.
Чёпеллеу а тура-созула келгенди,
Бийчечикге энтда джумуш бергенди:
Тийремде да баред юч да тенгим дейд,
Барчы, бийче, энтда аланы чакъырчы.
Алай болса бийче кетди, келтирди,
Чёпеллеуню берген джумушун ёлтюрдю.
Ашаб-ичиб ала, джаным, бошалла, дейди,
Тёрт элле да минг атлыгъа ушалла.
Келигиз, джашла, биз а энди кетебиз,
Танг атхынчы кюнбет элге джетебиз.
Келигиз, джашла, кюнбет элге чабайыкъ дейди,
Адам сайын а экишер джесир табайыкъ дейди.
Атландыла ала, джаным, кетдиле,
Кёб тюлдюле была, къуру тёртдюле,
Минг адамдан ала, джаным, бекдиле дейди
Ала чаба-джорта, тейри, кетдиле,
Ала барыб кюнбет элге джетдиле.
Кюнбет элге къарамайын чабдыла,
Кюнбет элден экишер джесир табдыла дейди,
Сау-,саламат ызларына къайтдыла,
Хапарларын биягъы бийчеге айтдыла.
Тынчайдыла ала, джаным, джатдыла,
Чёпеллеу а тынчаймайды, джатмайды, дейди,
Энтда чегет элге бармаса тынчлыкъ табмайды.
Туругъуз, джашла, чегет элге да чабайыкъ,
Бир къуруса да бирер джесир табайыкъ.
Тамбийланы да Чарахмат джигит ой, алай айтады:
— Къойчу, Чёпеллеу, бюгече ишибиз бизге толу
иш эди, Бусагъатда джукълаб, джаным, тюш кёрдюм,
Башыбызгъа къаты тиер иш кёрдюм:
Къарт атанг ныгъышда да олтурад деди,
Аны къатында да, джаным, тенги джокъ,
Эки чыначыкъгъа джете дженги джокъ.
Чарахматха Чёпеллеу алай айтады:
- Аман хомух, тюшге не ючюн ийнанаса дейди,
Тюш деген а джукъуланы богъуду,
Тюшге ийнаннган адамланы джогъуду.
Алай болса атландыла, кетдиле,
Чаба-джорта, джаным, чегет элге джетдиле дейди.
Чегет элден кёб джылкъыны сюрдюле,
Къача-къача четен къолгъа кирдиле.
Эки джигит тёрт юсюне джолукъду,
Чёпеллеуюм эрлай огъуна сорукъду.
Джан бересе санларынгы узатыб,
Къанынг барад Четен къолну къызартыб,
Алдыла да тоноу этиб кетдиле дейди,
Бу джарлыла къаллай джарлылыкъгъа джетдиле.