Ай аман джашла, ёзен ишде къалгъан эдик бёлек джаш,
Ёзен ишни ишлей кетдик да эки юлешдик.
Узун къолдан ачы-ачы къуугъунла келгенед,
Къанлыланы джетиб джан аямай кюрешдик...
Ай аман джашла, биз чыкъгъан эдик алты атлы,
Джетишген кюн тамам керти джан татлы,
Миннген атларыбыз учхан къушдан къанатлы.
Тамадалары Къоджакъ улу Салатгерий, хан атлы,
Экинчилери Мингкъой улу болур Гюргокъа,
Ючюнчюлери Тёббе улу джаш Къулча,
Миннген аты къанатлыдан бек уча,
Тертюнчюлери Езденланы джаш Отар
Тамам сюрсе, кёкде учхан къанатлыланы джетиб тутар,
Бешинчилери да болур Голаланы джигит Мыстафа.
Ай аман джанТла, къанлыланы сюре-къууа кетдиле,
Ызларындан а къанлы Барабанда джетдиле,
Ой джетдиле да анда къара къанла тёкдюле.
Ой, къарама, Къобан улу Къызылбаш,
Къарай кетдинг да джалан башынг кёрюндю,
Сени амалтын къара къанла тёгюлдю.
Ай аман джашла, шуулдайды бу Барабанны къаясы.
Бёлек улян болуб къалды къой бёлекни заясы.
Ай аман джашла, шуулдайды Барабанны къаясы,
Загъыштокъ улу джаш Джумай болду
Джангыз малгар окъну заясы.
Ай аман джашла, шуулдайды,
Бу Барабанны къуюсу, ой къуюсу,
Хансха чачылгъанды, не этейик,
Джаш Къулчаны тёббе мыйысы.
Ай аман джашла, малгарлыла
Мал сюрелле тишлик ючюн, эт ючюн,
Джашла къырылалла, ёлелле, не этейик,
Къарачайны намысы ючюн, бети ючюн.
Ай аман джашла, бу урушха келмей кгалгъан
Асланбек деген хомух окъа джагъалыд,
Хапа улу джигит гитче Махдини
Ой, бу кюнледе атхан огъу къалай багъалыд.
Ай аман джашла, Салатгерий аман кюнде
Джер салгъанд джанындан сюйген акъ атха,
Бизни джаныбыз къурман болсун, къор болсун
Елюлерибизни итлени тюбюнден къутхаргъан
Хырпысланы болур ашхы Шабатха.
Окъ тийгенди джаш Отарны бойнуна,
Кимле кирирле къаракъаш къатынынгы къойнуна?
Окъ тийгенди джигит Мыстафаны бутуна,
Кимле оноу этерле атасындан къалгъан джуртуна?
Кече болса, сен джулдузланы санайса,
Кюндюз болса, окъ джаралагъа къарайса,
Окъ джараларынг сени кюнде къуруйла,
Тёгерегингде сени ач бёрюле улуйла.
Сен, кече болса, джулдузланы санайса,
Кюндюз болса, уллу джолгъа къарайса.
Джолгъа къарай, кёзлеринги тот этдинг,
Шемшер хазырларынгы салыб от этдинг.
Сусабынга балчыкъ суула ичесе,
Кебининге одал чапракъла бичесе.
Джырта-джырта чегет расаны джурт этдинг,
Джата-джата окъ джараларынгы къурт этдинг.