Кюз къойчула Узун къолгъа кирдиле,
Малгарлыла бла хоншу джашайек,
Келе-бара тахсабызны билдиле,
Къобанланы къой бёлекни сюрдюле.
Къарачайгъа ачы къуугъун ийдиле,
Къой къуугъунну бизге этген ким болду?
Голаланы Оразайны къонгурау тамагъы.
Орундукъну тюбюне атылыб къалды
Голаланы Мыстафаны бал ашагъан табагъы.
Ол кюнледе бёлек улан ёзен ишге къалгъан эди,
Ишлей кетиб ёзен ишни тауусдукъ,
Ха-хай къуугъун, къой сюрюлдю дегенинде,
Бёлек улан къой аллына чабышдыкъ.
Къарачайдан чыкъгъан эдик алты атлы,
Тамадабыз Шаханланы Салатгерий, хан атлы.
Аракъыдан бал татлы,
Джетишген кюнде болмасын джан татлы.
Салатгерий ханны миннген аты,
Чычхан сыртлы сары аты,
Чаба-джорта малгар таудан къаратды.
Сары атны тау башында ышхылдыгъа къантардыкъ,
Кюреше кетиб Къобанланы къой бёлекни къайтардыкъ.
Къойла кетдиле тюз энишге,
Кюрешеек къазауатха кирише,
Башыбыз къалмасын Къарачайда къатын бедишге.
Бёлек улан ёзен ишге къалгъанек,
11шлей кетиб ёзен ишни тындырдыкъ,
Чаба барыб кесибизни къойдан аман къырдырдыкъ.
Гюрюлдейди Барабанны къаясы,
Бола шойбуз ит гяурну табасы.
Къалай къыйынды Гондарайны ауушу,
Тунакы чыгъады Къулча атыучу
Къара шкокну тауушу.
Малгарлыла бал къуялла тау артында чырчагъа,
Машалла болсун Байчораланы Теммотну уланы Къулчагъа.
Атыла-атыла къара шкок узунуна джарылды,
Хырпысланы джигит Шабатны
Къычыра-къычыра конгурау тамагъы къарылды.
Экиндиде Гара аузда ачы шкок атылды,
Кюн аллында сохталада сууаб салах тартылды.
Тогъуз кюнню тау артында къазауат этдик тохтамай,
КъайрыбарабызКъочхарланы джигит Кючюкню джокъламай.
Бек битгенди тау артында чынары,
Бу хапарланы барыб айтсакъ,
Анда келир аналаны джылары,
Къалай къыйынды тогъуз окъ джарагъа чыдары.
Кече болса, джулдузланы санайма,
Кюндюз болса, джаралы айюлей джан-джанымы талайма.
Усабыма хазырым бла Садыр (Садырла — Уму Къарачайда бир джерни атыды.) суула ичеме,
Кебиними бычагъым бла одал чапракъладан бичеме.
Тогъуз кюнню тау артында сал агъачны джюрютдюм,
Джата-джата тогъуз дарий тёшек чиритдим.