Стампулчула Стампулгъа кетдиле,
Мында къалгъанлагъа ие къыйынлыкъла джетдиле,
Ол кюнледе бизге болур болгъанды,
Акъ бетледен къызыл нюрле онгнганды,
Бизни элибиз къолан худийледен толгъанды.
Ол кюнле машхарланы кюнюдю,
Аллай къотурбашны джети джаханим юйюдю.
Джылау болду Тебердини уллу тойлары,
Мангырай къалды Гата къыйынлыны
Буу Ёлгенде къойлары.
Тебердиде кибик къара къозу соймайла
(Пара алмайын юй салкъынлагъа къоймайла.
Кемеле келелле бизни аллыбызгъа чабханлай,
Биз джарлыла Стампулдан къалмай кетерек,
Бурун кибик Тебердини табханлай.
Ой, иги сагъан Теберди къобанны табаред,
Сыйлы шамда ётмек бла ашаргъа,
Джаратхан аллахдан буйрукъ табаред
Бурун кибик тик кюннюмде
Джети эл болуб джашаргъа.
Ой анам, анам эки эшигинг шау болсун,
Теберди ёзени шайтан аумаз тау болсун.
Миннгенибиз кеме бла машина,
Биз барабыз мухаджирлени ашыра.
Ой, Зулихатым, Зулихат,
Джылай къалды Баракъны къызы Анисат,
Ой, анам, анам, сени эки эшигинг къуругъанд.
Мени атам, излегенинги табханса,
Ичингден чыкъгъан эки балангы
Гяур къолуна джууукъ джетмеген адамлагъа атханса.
Ой анам, анам, сени эки эшигинг шау болгъанды,
Джылай-джылай ол ариу санларым къуруйла,
Артымда къалгъан джарлы эки эгечим
Орамлада ит кючюклеча улуйла.
Ой, мени атамы эски юйюню эшиклери Къобаннга ачылыб,
Къыздан айбат джашларынг баралла джылаб-джылаб,
Атчабханны энишге чачылыб.