Джангурла джауалла,
Кёкде булутла къаралыб.
Аскер чьткъгъанды,
Уллу Къарачайдан саналыб.

Джашла баралла
Темир машинагъа къаланыб.
Анала къалалла
Аланы ызындан таралыб.

Джашла баралла
Чоюн машинагъа басыныб.
Отоула къалдыла
Ой, эшиклери тартылыб.

Уллу Къарачайда
Болур начальнике, сюдюле.
Джазыкъ джашланы
Ой, мыртазакъла сюрдюле.

Ала баралла
Ой ышармайын, кюлмейин.
Алда, харибле,
Ой болур ишни билмейин.

Биз салыб энди
Уллу Славагъа баргъанбыз.
Анда кесибиз
Бир тишлик тууар алгъанбыз.

Ол тууар тюлдю,
Болур экиджашар уанык,
Джашла къайтсынла
Ой, къууанч этиб, джубаныб.

Къайиш этгенбиз
Тишлик тууарны терисин.
Сууда къоймагъыз
Джарлы Хаджалийни ёлюсюн.

Мындан баргъаненг
Сен аскерлеге баш болуб.
Сууда къалгъанса
Ой, чабакълагъа аш болуб.

Сени юсюнг бла
Орус джюзюучюле джюзелле.
Бут этлеринги
Ыргъай чабакъла юзелле.

Хаджалий кетди,
Къара тенгизге кёмюлдю.
Суугъа ташайгъынчы
Джарыкъ дуниядан тюнгюлдю.

Сотня аллында
Сен ойнай-кюле чыкъгъаненг.
Эки этегинги
Бюрек башындан къайырыб.

Ой машинаны
Къабыргъалары къангадан,
Айырылыб барабыз
Ичибизде бёлек маджалдан.

Ой, иги сагъан
Мен кёк кёгюрчюн болгъаем
Къанатымы къагъыб,
Кёкге, мийикге учаргъа.

Термилеме, джашла,
Ой, энди ёлеме
Къобанны сууундан
Джангыз стакан ичерге.

Ой, ат юсюнде
Сени теуан эшген къолларынг
Уллу Славада
Шай стаканны тутмайды.

Бал таракъланы
Саулай джутуучу тамагъынг
Уллу Славада
Къуру шекер шайны джутмайды.

Акъгъан къанынгы
Калак маскеле джалайла.
Ариу къатынынгы
Къыстеке моллала марайла.

Ауруу табханма
Мен машинаны ууундан,
Ай, иги сагъан
Аузу толу бирни ичеред
Уллу Къарачайны
Сууукъ чокъуракъ сууундан.

Къыргъый санларынгы
Джелле, джангурла тарайла.
Елген ёлюгюнге
Докторла келиб къарайла.

Сени къабырынгда
Шаптал терекле бителле,
Сени кебининге
Ой, зем-зем суула бюркелле.

Сен аскерликге
Ой, элтген эдинг кёб кийим.
Къайтыб баралла
Артмакъдан чыкъмай, морт болуб.

Кийимлеринг къалды
Артмакъдан чыкъмай, кирленмей,
Кетиб а бараса
Толу Къочхарлада юйленмей.

Ариу Даумханнга
Мени къагъытымы беригиз.
Джангыз сабийими
Мени кёзюмден кёрюгюз.

Сюйген тенглерим
Тилесе бармай къалмасын,
Сюймегенлериме барыб,
Мени къабырымы джармасын.