О Къазий улу да бир батыр туугъан Басханукъ,
Ой эчкилеринг бир сюрюучюсюз келелле,
Зыбырыкъ кириб, джаным, ала ёлелле.
Ойра Къазий улу джигит Басханукъ,
Абадан эркечинги аты Дыгылмай,
Ай сау джюрюгюн бу къаялада, джыгъылмай,
Абадан эчкинги аты Эмиргенд дейле,
Тауукъ башланы бир бычакъсызлай кемирген.
Къазий улу бир джигит туугъан Басханукъ,
Ой эртден бла эртде туруучу,
Тауда кийиклеге сюрюучю,
О Къазий улу бир тулпар туугъан Бахсанукъ,
Танг атмайын мийик тауладан къараучу,
Тау кийиклени сыртларын сылаб санаучу,
Кийикле бла бу джарлылагъа джараучу.
Да былаймыды бу Басханукъну оюну,
Юч да уллу гардош кирген чоюну,
Тау бугъа кибик бу Басханукъну боюну.
Джаягъында къаплан ала табы бар,
Шкогунгу кийизден, джаным, къабы бар,
Алтын юлленги мурса къаурадан сабы бар.
Эгечинг Гогуш санга къонакъгъа келгенди,
Ой келген эсе да бир къонакъ кибик кёрюгюз,
Эчкилени бёлюб джартысын анга беригиз,
Эчкилени бир азды санлары-онсегиз.