Мыдахланыб нек тураса, ариу,
Джолну джанына олтуруб,
Ингичге белинг, кенг джаурунунг
Джюрюсенг джолну толтуруб.

Сени сюймейин къалай этейим,
Къара къашларынг къошдула,
Мен да сюйгенча сен да сюйсенг,
Къалгъан сюйгенле бошдула.

Сени башынгдагъы косынкачыкъ,
Гокка, Аны ортасында аласы,
Сени сюйгенли кетерге унамайды
Мени джюрегими джарасы.

Мен былай бла къалай джашайым, Гокка,
Акъылым эки бёлюнюб,
Кече джукъларгъа къоймайса, ариу,
Тюрсюнюнг кёзюме кёрюнюб.

Тёбен джаныбызны булут басханды,
Ах кёрюнмейди элибиз,
Аллах бла тилеб айтама,
Быллай бир термилтмей келигиз.

Санга таралыб письмо джазама,
Ах тюрсюнюнгю кёрюрге,
Ий, Аллах ючюн, эркинлик бер
Беш минутха ишинги бёлюрге.

Ах, эршиди дейле, ариуду дейле,
Джюрек сюйген ариуду,
Кёрюрге сюе тургъанлайыма,
Кёрсем джюрегим ауруйду.

Джолда джюрюсе алай джюрюйдю,
Бетиме кюн тиеди деб,
Джаш акъылынг алай болур,
Кёрген къыз мени сюеди деб.

Сен ариуну эки кёзюнг
Сютге дугъум атханлай,
Къалай татлыды да сёзюнг
Балны конфет бла къабханлай.

Хоншу юйде эки эгеч,
Бир-бирлерин къалай сюелле,
Сен ариуну сюйген джашла
Джюреклеринден кюелле.

Эртден бла эртде, кюн къакъгъанлап
Сагъышлыма мен санга.
Чыпчыкъ джырласа, танг атханлай
Сагъышлыма мен санга.

Тюзде ишлеген къыз алчы болса,
Сагъышлыма мен санга.
Школгъа баргъан сабий ышарса
Сагъышлыма мен санга.

Агъачлада талала,
Чалкъы бла чалалла.
Къызла джашланы сюйселе,
Анала джукълаб къалалла.

Кёкде баргъан зурнукла,
Бара-келе турлукъла.
Эки сюйгеннге заран болгъанла
Къарынлары бурлукъла.

Сени ариулугъунг тамам ушайды
Тийген кюнюме джарытыб,
Бетинги нюрю кюннге эришеди
Аныча кесин танытыб.

Сени ариулугъунг тамам ушайды
Мартда чыгъыучу джанкъозгъа,
Джашиллик хорлаб, джашауну онглаб,
Джерге нюр салгъан джазгъа.

Эй, сенден ариу кёрмедим, Кулина,
Ой мен джашагъан джуртлада.
Сеннге ушатыб, гокка хансланы
Басмай джюрюйме сыртлада.

Эй, сенден ариу кёрмедим, Кулина,
Да мен айланнган элледе,
Саннга ушатыб сапран чабакъланы
Излеб айланама кёлледе.

Эшиклени ары бир ач,
Ары бир кирейим,
Кёзлеринги ариулугъун,
Кесим бир кёрейим.

Кёзлерими ариулугъун
Билмегенмисе,
Чегетледе къара дугъум
Кёрмегеимисе,

Ата джуртунгу, Осман, кемсиз бек сюеенг,
Ата джуртну сакълаб ёлгенсе,
Къарачай элни джаш тёлюскше
Махдаулу юлгюню бергенсе.

Сени памятнигинг джылтырайды, Осман,
Могилёв шахарны ичинде,
Ит фашистлени биз джокъ этгенбиз
Совет аскерни кючюнден.

Къарачайны къаблан кёллю уланы,
Миннген атынг къурчдан кючлю къадамад.
Уруб ётдюнг Днепр, Дунай сууланы
Узакъ джерге элтди узун къазауат.

Танка полкунг джолгъа чыгъыб тебресе,
Джер тебрениб, кёк тебиниб башлаед.
Урушлада джаугъа тюбеб сермесе,
Тобдан атыб джанкъылычла джасаед.

Туура урушха дери джетдирдинг,
Тау чам бла бизни кюлдюрюб,
Поездде бара, сен джырлай эдинг,
Ачыкъ кёлюнгю билдириб.

Бютеу дунияны саулай башына
Биз тынчлыкъ джашау салырбыз,
Ит фашистлени тюк-тюк этербиз,
Геройлукъ атны алырбыз.

Мыстафа бла Азрет-Алийден
Манга киши хапар сормагъыз,
Кърал ючюн ёлген джашлалла,
Быланы унутуб къоймагъыз.

Былагъа этген мени кюуюмю
Кёб джыйылгъан джерде джырлагъыз,
Къуран окъугъандан эсе сууабды,
Букюуге тынгылагъыз.

Ах, Мухаджирим деген заманда
Джер тенгли болад джюрегим.
Финляндияда тас болуб къалгъанд
Къаблан, аслан кибик билегим.

Ах, мени къаргъагъан, мени къаргъагъан
Менлей къыйынлыкъла сынасын.
Къарнашы джокъ болуб, джан-джанын сермеген
Манга тынгылаб джыласын.

Ой, Къызыл Аскер барыб ачханды
Гитлерни тургъан юйлерин.
Кюн да, кече да айтыб джылайма
Джарлы Энверни кюулерин.

Мени Энверим келеди деселе
Къатапа джаярем джолуна.
Кюн да кече да къараб джылайма
Энверим, келлик джолунга.

Кёкню къойнун къармай, джерни башын аулай,
Дунияны кёрген кёгюрчюн,
Сен Рамазандан келтир бир тюз хапар
Шо бу джол бир къыйнал мени ючюн.

Къолунгдан а келмей къаллыкъ тюлдю
Бюгюн аны кёрюб къайтыргъа,
Мен къайдагъысын а билмейме кесим да
Санга былай бар деб айтыргъа.

Ой, ой Москвада ишленнгенди дейле
Алийни алтын къамасы.
Бир-бирин къучакълаб джан бергендиле дейле,
Ой, Алий бла анасы.

Ой, госпиталда джатмайын, Алий,
Къанлы Тебердиге нек келдинг,
Къазауат этиб бермеген джанынгы
Худжу немчалагъа нек бердинг.

Кёбле кёб тюрлю сёзле айталла,
Ий къайсы болур кертиси,
Мени джаууму юйюнден кетгеед
Къарнашларыны тёртюсю.

Ёлгенден сора къайгъым къалмайын
Джаным ахырыма джыйылды,
Сагъыш этигиз, тёртюсю огъай эсенг,
Бири кетген да къыйынды.

Къарангы тубан басханды
Дальний Востокну ара шахарын,
Сау алты джылны сюйгеними
Алгъанма ёлген хапарын.

Ёлген хапарын айтыб келдиле
Тенг джашларыны ючюсю,
Наным, джанынга къурман болайым
Джети къарнашны кичиси.