Агъачлада талала,
Чалкъы бла чалалла.
Къызла джашланы сюйселе,
Анала джукълаб къалалла.

Кёкде баргъан зурнукла,
Бара-келе турлукъла.
Эки сюйгеннге заран болгъанла
Къарынлары бурлукъла.

Сюйгенин къараб кёргенни
Къууанады джюреги.
Менден джарлы ким болур,
Табалмай къалгъан тилегин.

Челек алыб барама
Къара суудан алыргъа,
Атам-анам къоймайла
Сюйгениме барыргъа.

Ёзенде атлы келеди,
Джоргъаламай, джюрюшлю,
Атам-анам болсунла
Джаханимден юлюшлю.

Сюйген, сюйген деселе
Мен ашамайын тояма,
Сюймеклик сингнгенди манга,
Джаш джанымы джояма.

Суу бойнунда акъ бабуш,
Сууда болады джашауу,
Дунияны, керти айтсанг,
Сюймекликдеди татыуу.

Сюйгеним атха миннгенди,
Къазыкъгъа къаргъа къоннганлай,
Сюйгеним тукъум болгъа эди,
Джангызла тукъум болгъанлай.

Алаша терек шабдаллы,
Сюйгеним къызыл къабдаллы,
Къызыл къабдалынг бир джанлы
Сенден къалмам мен джарлы.

Тауладан мийик тау болса,
Мен джылан болуб ётерем,
Мен сюйгенлей сен сюйсенг,
Джанымдан юлюш этерем.

Отоугъа кириб баргъанлай,
Столгъа салдым къолуму,
Иги тюшле кёреме,
Сюйгеним келлик болурму.

Къаялада улакъла,
Ала тоюб макъыра,
Къыз тенгчигими ийгенме
Сюйгенчигими чакъыра.

Башымдагъы джаулугъум,
Джел уруб артха атады,
Сюйгенинден къалгъаннга
Кёре тургъан хатады.

Отха къазан асханма,
Ой къайнамайын бишмейди,
Насыбы болгъан адам
Сюймеклик отха тюшмейди.

Таудан къараб кёреме
Кюнню тюзге батханын,
Мени тенглерим билмейле
Тангымы къалай атханын.

Юсюмдегн чебгеним,
Тар болады джырмачы,
Эки сюйгеннге заран болгъанны
Джылау болсун къууанчы.

Сюйгеним ишге барады,
Чалкъысы болур бойнунда,
Ол эскилеге ушамайды,
Закон тефтери къолунда.

Кёзлерим чыракъ барады
Юйню башы къанджалгъа,
Мени джаууму атылсын
Иши узакъ болджалгъа.