Статьи

Главная » Статьи » Материалы библиотеки » Общие 1

В категории материалов: 774
Показано материалов: 161-180

Страницы: « 1 2 ... 7 8 9 10 11 ... 38 39 »

Сортировать по: Дате · Названию · Комментариям · Просмотрам

Къарачай халкъ джырла
Карачаевские народные песни
Джарашдыргъанла Гочияланы С. А., Ортабайланы Р. А. - К., Сюйюнчланы X. И.

СОВЕТ ДЖЫРЛА

Сюймеклик джырла, инарла, кюуле

Темирден бедженле тыймазла, наным,
Мени санга айланнган къанымы,
Сюймеклигиме ийнанмай эсенг,
Чыгъар да бир алчы джанымы.

Юй башыбыздан келиб къарады
Кёзлери ала джумарыкъ,
Ауругъанымда келиб кёрмединг,
Аурууум санга джугъарыкъ.

Тарыгъыуларымы айтама

Сизни юйюгюз узакъ тюлдю
Мен барама да къайтама,
Айыб этмегиз, мени тенглерим,
Тарыгъыуларымы айтама.

Тарыгъыуларымы айтыб башласам,
Бир джылдан алгъа бошамам,
Ой, былай энтда бир джылны турсам,
Адам инсаннга ушамам.

Термилеме сеннге

Мени сюймекликден хапарым джокъ эди,
Аз акъылымы алгъынчы,
Кирпиклерими къакъмай къарайма,
Кёзлерим кёрмей къалгъынчы.

Сен — майда чыкъгъан гокка хансчыкъ,
Мен да джел болуб урама,
Сенге сюймеклигим ауруу болуб тийгенди
Сеннге термиле турама.

Наным, джанынга болайым

Кёзюмден акъгъан мени джыламугъум,
Ол джерге тюшмей кёл болсун,
Да сени ючюн ахсыннган тылпыуум
Тенгизле чайкъар джел болсун.

Кече джатсам алай болама
Къалай чыгъайым тангнга деб,
Кёзюнге къараб къалай айтайым
Сюймеклигим барды санга деб.

Башханы сюеме

Хар заманда да мен айтыучан эдим
Сал джюрегинге таукел деб,
Къачан отоугъа кириб барлыкъма
Кече ашхы болсун, сау кел деб.

Мени ариучугъум меннге ант этгенди
Башха джашлагъа бармазгъа,
Аллыбыз бла озуб тебресенг
Кюн тиеди бизни арбазгъа.

Сюеме

Олтуруб тургъанлай, мыдах заманда
Сени атынгы айтыб турама,
Мийикде булутлагъа, джарыкъ джулдузлагъа
Сени хапарынгы сорама.

Чегет ичинден Ай бери ышара,
Сенича джарыкъ тиеди,
Эки кёзюнге къараб турургъа
Менден эсе бек сюеди.

Бир кемсиз сюидюм

Ийнар айт дейсиз да къоймайсыз,
Мен ийнар айта билмесем,
Ийнар айтыргъа къайдан билейим
Сюймеклик къаннга кирмесем.

Аллыбыздагъы кириш къаяла,
Анда кёгюрчюнле бугъалла,
Сюймеклик къаннга кириб тебресенг,
Ийнарла джерден чыгъалла.

Джууаб джаза тур

Сары сакъалыма да акъ кюмюш урады
Сюймеклигими джашыра,
Сен, булбул чыбчыкъ да, бир келмезмисе
Мени армиягъа ашыра.

Танкама миниб, эсиме тюшюрсем,
Аны къурч санлары эрирле,
Джюрекде болумну да юслерине тюйреб
Письмоларым санга келирле.

Маралым

Хар кече сайын тойлагъа айлана
Мен хауле болуб барама,
Ой алай эте, ой былай эте
Холостойлай къалама.

Кюн джылтыраб тиеди
Ойра, бу мийик башлагъа,
Мени ариучугъум суугъа барады,
Абына-абына ташлагъа.

Джюрек джаууму ашама

Келигиз, къызла, ийнар айтайыкъ,
Кимни тарыгъыуу кёб эсе,
Бирден сора сюйгени болгъанны
Сюйгени ёлсюн алесе.

Къарайма да — къарайды дейле,
Къарамайма да — зарды дейле,
Кёзюнге къараб мен турсам,
Мында бир къайгъы барды дейле.

Сюймеклик ауруу

Хар эртден, ингир чыгъыб къарайма,
Аллыбызда Кавказ таулагъа,
Сюймеклик ауруу санларыма сингнгенди,
Къайтыргъа унамайды ызына.

Хар эртден, ингир чыгъыб къарайма,
Аллыбызда уллу таулагъа,
Онгмагъамлагъа нёгер болгъанма,
Къошулалмайма саулагъа.

Ой юсюмдеги чепкеним

Ой юсюмдеги чепкеним,
Этеги, дженги оюулу,
Сюйгеним къатын алады дейле,
Ах, алларында той уллу.

Ой, къолумдагъы къол джаулукъ,
Хурджунума салсам толурму,
Тойлары тойлай къалмай, анам,
Артлары джылау болурму.

Къалайды сени муратынг?

Атынг да Джашдыу, кесинг да Джашдыу,
Джашдыу атадым атынга,
Кел, экибиз да кетиб къалайыкъ
Къара тенгизни къатына.

Сени юйюнгю мен танымайма,
Джолоучулагъа сорурма,
Ой кесим кибик кёбле бардыла,
Ала болгъанлай болурма.

Сюерик эсенг, сюй

Сен да сюесе, мен да сюеме,
Сюйген джюреклени сууутмай,
Бир эки ийнар этиб иейим,
Айта турурса унутмай.

Орамыбыз бла озуб тебресенг,
Сен бизге да бир къара,
Ай сени амалтын тюшгенди, бала,
Джаш джюрегиме бир джара.

Тюнгюлтме

Бу сюймекликден киши да ёлмейди,
Мен сюймекликден ёлеме,
Эресейни бютеу айланыб,
Сенден ариу кёрмей келеме.

Алтын чач таракъчыкъ мен да аллыкъма
Бурма чашчыгъынгы тараргъа,
Самолет бла бара турлукъбуз
Москвада циркге къараргъа.

Сени амалтын ёлмейме

Ой сюйдюм-сюйдюм, бир бек термилдим,
Сени кёлюнгю билмейин,
Къыйырында тохтаб нек къалмадым,
Былай тереннге кирмейин.

Ай мен джашагъан дунияда, анам,
Сюйгенимден ариу кёрмейме,
Алай кётенли болма, ариучукъ,
Сени амалтын ёлмейме.

Сюйгенчигим

Таулада айлана,таулада айлана
Тау кёллю болуб къаласа,
Джанымы алыб, хурджунунга салыб,
Гоккачыгъым, къайры бараса.

Мени къолумдагъы къол джаулукъчугъум,
Хурджунума салсам экиди,
Бу сюймекликден адам ёледи дейле,
Ий, аланла, къалай кертиди.

Письмоларынгы ие тур

Юсюнгдеги сени чепкенинг,
Къуру да аны кие тур,
Таймайын сени сюйгенлей турлукъма,
Письмоларынгы ие тур.

Джолну джанында юйнргюз,
Терезелери мияла,
Кел, экибиз да бирге барайыкъ,
Экибиз да бирден уяла,

Сакълайма

Таулада ёсген субай наратча,
Ариуду сюегинг,
Ай, ариу наным таугъа кетгенди,
Кюеди джюрегим.

Ах, иги сагъан, кёгюрчюн болуб
Санга бир барыред,
Билмей тургъанлай, сени къатынга
Бир тюшюб къалыред.

Кёгала

Кёкле тюбюнде кёкбаш юйледе
Джашайды ариу Кёгала,
Экибиз бирге кюйюб барабыз
Кёгала, санга тарала.

Джарыкъ джулдузча, сени тюрсюнюнг
Къууат салады шахаргъа,
Ышаргъанчыгъынг, ала кёзлеринг
Къоймайла бизни джашаргга.

1-20 21-40 ... 121-140 141-160 161-180 181-200 201-220 ... 741-760 761-774

Карачаевцы и балкарцы

Статьи