Ийнар айт дейсиз да къоймайсыз,
Мен ийнар айта билмесем,
Ийнар айтыргъа къайдан билейим
Сюймеклик къаннга кирмесем.

Аллыбыздагъы кириш къаяла,
Анда кёгюрчюнле бугъалла,
Сюймеклик къаннга кириб тебресенг,
Ийнарла джерден чыгъалла.

Ах сюйдюм, сюйдюм, бир кемсиз сюйдюм,
Сюймеклик хали билмейин,
Ах, къыйырында тохдаб къалмадым,
Тамам теренине кирмейин.

Юйюбюз артында да уя бар, ариу,
Уягъа къоян букъгъанлай,
Сюйгеним болгъанын къалай билмейсе,
Аузумдан ийнар чыкъгъанлай.

Сени санларынг къалай ариудула,
Къараб турургъа ызынгдан,
Сёлешген сёзлеринг акъыл бередиле
Зыраф чыкъмайды аузунгдан.

Мен сылаб-сыйпаб кирсиз тутар эдим,
Белинге такъгъан къамангы,
Кичи келини болуб къалсам эди
Сени ёсдюрген анангы.

Сен колхоз тишлени уста къалайса,
Бнченни, будай саламны,
Джангыз кюеую болуб къалсанг эди
Джанымдан сюйген анамы.

Хаулесе дейле, эршисе дейле,
Тынгыламайма хапаргъа,
Менде кёзле бла къараса элле,
Аман кёрюнмезенг алагъа.