Кёзюмден акъгъан мени джыламугъум,
Ол джерге тюшмей кёл болсун,
Да сени ючюн ахсыннган тылпыуум
Тенгизле чайкъар джел болсун.

Кече джатсам алай болама
Къалай чыгъайым тангнга деб,
Кёзюнге къараб къалай айтайым
Сюймеклигим барды санга деб.

Таралмай тангнгынг атмасын, кёзбау,
Джыламай кюнюнг батмасын,
Мени кёрмей къалгъан кюнюнгде
Джюрегинг тынгы табмасын.

Къалгъан сюйгенле бары да бошдула,
Мен сени бла къалайым,
Биченликде ёсген гокка хансчыгъым,
Наным, джанынга болайым.

Чурукълагъа заказ бергенме, Аминат,
Ишлене туралла товарсыз,
Сени джауунг джашны сюйгеед
Акъылы джетмей, замансыз.

Адам сюйгенин къалай табмаз,
Ма суу баргъанлай баргъаннга,
Термилиб турмай, не боллукъду
Сюйгенин сатыб алгъаннга

Адам сёзлеге къарама,
Адам сёзледен безерсе,
Елмесем санга мен да барлыкъма,
Мен ёлсем, сен да тёзерсе.

Башымдагъы мени джаулугъум,
Къанатын джел кёлтюрсюн,
Сени сюеме, санга барлыкъма,
Сюймеген кесин ёлтюрсюн.

Элде ариула кёбдюле,
Элде ариулэдан тоярса,
Сюймей эсенг да къолунгу бир тутдур,
Артда джуарса да къоярса.

Алай тур, ариучукъ, бир айтырым барды
Ушатмасанг кетерсе,
Эки кёзюмю къаты къысыб,
Къучакълаб къойсам не этерсе.

Сен эсиме тюшсенг къараялмайма
Москвада ариу къалагъа,
Къалгъан ауруугъа дарман да джарайды,
Сюймекликден а ёлюб барама.

Москвада къар да, джангур да джауады
Кавказда хауа къалайды?
Сени меннге ийген картынг, бала,
Сагъыш чачаргъа джарайды.

Кюнню булутдан чыкъгъаны, бала,
Джюрегими джауун ашайды,
Да мен мында, сен да анда,
Бу сюймеклик неге ушайды.

Акъ тамакъчыгъынг, къара къашларынг
Хар къуру кёзюмден кетмейди,
Джюрек сюймеклигим сёнгюб болмайды,
Джазыугъа кючюм джетмейди.