Ой юсюмдеги чепкеним,
Этеги, дженги оюулу,
Сюйгеним къатын алады дейле,
Ах, алларында той уллу.

Ой, къолумдагъы къол джаулукъ,
Хурджунума салсам толурму,
Тойлары тойлай къалмай, анам,
Артлары джылау болурму.

Къол джаулугъуму джуууб салгъанма
Эшик аллында чалманнга,
Мен сууукъ суула уртлайма
Кюйген джюрекге дарманнга.

Къол джаулугъуму джуууб джайгъанма
Эшик аллында чалманнга,
Сюйгеним къыйын аурусун да
Мени излесин дарманнга.

Мени кюсесе дарманнга,
Мен аны кёре барырем,
Эшикден юйге кирирге унамай,
Аны джюрегин джарырем.

Эшик аллына чыкъгъанма,
Ариу аяз урады,
Майна сюйгеним, майна сюйгеним
Мени туурамда турады.

Туурамдан къараб турма да
Алайдан ары кетсенг а,
Мен сени амалтын ёлюб барама
Манга бир мадар этсенг а.