Атынг да Джашдыу, кесинг да Джашдыу,
Джашдыу атадым атынга,
Кел, экибиз да кетиб къалайыкъ
Къара тенгизни къатына.

Сени юйюнгю мен танымайма,
Джолоучулагъа сорурма,
Ой кесим кибик кёбле бардыла,
Ала болгъанлай болурма.

Кёкде къанатлы, джерде къумурсха,
Джанымдан джарлы болурму,
Юренчек болуб, салыб джылайма
Мен джюрегиме къолуму.

Сени билегинг, мени джюрегим,
Кел больницагъа барайыкъ,
Сени атангы, мени анамы
Кел джюреклерин джарайыкъ.

Къара къашларынг, ала кёзлеринг
Джюрек джаууму ашайла,
Ох, сенден келген къуру письмола
Мени не кюнюме джарайла.

Кёзюнге къараб къалай айтайым,
Сюймеклигим барды сеннге деб,
Саулай джамагъатха джылаб чыгъарыкъма,
Бир мадар болсун манга деб

Хар эртден сайын чыгъыб къарайма
Мен сени джюрюр джолунга,
Сенден аягъан мени джаным джокъду
Чыгъарыб берейим къолунга.

Мутхуз кюнню джарытад, бала,
Ох сени ариу суратынг
Тилейме сенден, джашырма, бала,
Къалайды сени муратынг.