Келигиз, къызла, ийнар айтайыкъ,
Кимни тарыгъыуу кёб эсе,
Бирден сора сюйгени болгъанны
Сюйгени ёлсюн алесе.

Къарайма да — къарайды дейле,
Къарамайма да — зарды дейле,
Кёзюнге къараб мен турсам,
Мында бир къайгъы барды дейле.

Кёкде баргъан кёгюрчюн
Кёксюл ала кёрюнсюн,
Башыма джетиб сынадым,
Къаллым былай термилсин.

Термилгенликге киши ёлмейди,
Мен аурумадым, ёлмедим,
Мен джаратылыб, эс билгенли
Сюймекликден ачы кёрмедим.

Сюймеклик ауруу къалай къыйынды,
Ах, андан адам ёледи,
Къатынгдан къараб тургъанлайыма
Тансыкъ болурум келеди.

Къара къашларынг, акъ мангылайынг,
Бир ариудула кёзлеринг,
Чыртда эсимден кетерге унамайды
Школда айтхан сёзлеринг.