Мени Армиягъа ашырыб, ариучукъ,
Энди кесинг элде джашайса,
Тансыкъ болгъанма, кел, деб джазаса да
Джюрегими джауун ашайса.

Тансыкъ болуб къарайма, ариучукъ,
Къарагъанлыгъыма кёрмейме,
Джангыз тырнагъынгы, къаракъашчыгъым,
Сени он къызгъа да бермейле.

Ата джуртуму аскер джумушуна
Мен джылым джетиб тебредим,
Сюйген къызындан айырылыб кетген—
Андан къыйын зат кёрмедим.

Къалай ариу сейир кёреем
Белоруссияны ауушу,
Къулагъыма келгенлей барама
Иги джолгъа деген тауушу.

Юйюбюзню башы ол мийик таула,
Тауланы тюбю тар сызгъа,
Атам берсе да къалай барлыкъма
Акъылсызгъа, малсызгъа.

Мени атам алай айтады:
Берлик тюлме джарлыгъа,
Атам берсе да къалай барлыкъма
Кеси тели болгъан маллыгъа.

Кёкле тюбюнде кёкбаш юйюгюз,
Ол мийикди кёкледен,
Сенден умут этиб, ариуум,
Къуру къалгъанма кёбледен

Кёкле тюбюнде кёкбаш юйюгюз,
Кёгюрчюнле келиб къоналла,
Джарыкъ джаныучу лампаларыбыз
Сени кёрюб мутхуз джаналла.

Айт дей эсегиз да мен айтайым
Сюймеклик бла халымы,
Толгъан айдан джарыкъ, тийген кюнден джылы,
Къоюб тебрегенме нанымы.
Сары сакъалгъа акъ кюмюш урду,
Сюймеклигими джашыра,
Сен булбул чыпчыкъ, бир келмезмисе,
Мени армиягъа ашыра.

Туурагъыз кёпюрден кючден ётеме
Эсиме тюшген кёзюуде,
Тауушун эштсем, джюрегим тёзмейди,
Галя къошулмасын эжиуге.

Джюрюген джерде къумгъа тюшеди,
Галяны аякъ ызлары,
Мени къызыма джеталлыкъ тюлле
Бютеу Пахта-Аралны къызлары.

Ой, «Болыневикге» бареанг а, Айшат,
Сени къызгъанама «Тельманнга»,
Сени таныб а джюрек ауруу табдым,
Къайдан табылдынг сен манга.

Хар бармагъынгда зкишер джюзюк, Айшат,
Он бармагъынга сыйынмай,
Айшат абезекде бир къат айланмайд, тенгле,
Бир-биринден он джаш сыйырмай.

Ай суратынгы алыб къарасанг а, Ала,
Булбул джырлайд санга тюз къатыб,
Чыракъ керек болмайд джашагъан элинге.
Бетинг турад кюнча джарытыб.

Эки джаягъынгдан ургъан джарыкъ кюнден.
Ала, метр бузла эрийле,
Сеннге ушайдыла, мен сынаб къарайма,
Терекледе татлы балийле.

Чокъуракъ сууну кёксюл кёлюча,
Ала кёзлеринг ышара,
Къуш къанатлача, узун кирпикле
Ала кёзлени джашыра.

Хурзук тюзюнде гокка хансланы
Сен эгечлери боласа,
Оюнда, ишде, къызла ичинде
Хар джерге хурмет саласа.

Ой, джарлы джашла кетиб баралла
Гоначхирни ёрге тизилиб,
Ой, мен джарлы да ёлселе не этерме
Башларындан къулакъ юзюлюб.

Къатапа кюйюз да болуб къалгъаем
Гоначхирни ташлы джолуна,
Къоркъуулу джерге да кетгенди ариучу
Эсен-еау келсин къолума.

Таукъаным таугъа кетгенди,
Ол анда кийик ёлтюрюр,
Муссаны джаны эсен болса,
Таукъанны бизге келтирир.

Таукъаным кетиб барады
Тау кийиклени мараргъа,
Апсатыны алыб барлыкъма
Таукъанны аллына къараргъа.

Ёмюрде кишини сюймеген эдим
Сен ариучукъну кёргюнчю,
Аллыма къараб турурса, ариу
Мен Москвадан келгинчи.

Къолунгдагъы да ол портфельни
Сен бу акъ столгъа салсанг а,
Кесинг баргъан ол Москвагъа
Мени да ала барсанг а.

— Джаным —деме, санымы отда кюйдюрме,
Ол гокка кёзлю сен болгъанынгы бшщгрме,
Джаным — десенг, мени саным отда кюеди,
Ариу сёзлеринги джюрегим бир бек сюеди.

Джандан татлы ол ариу бала сау эсе,
Кёкде джулдузла бла мен анга салам береме,
Кёбден бери термиле, тарала айландым,
Ол аламатны таймай тюшюмде кёреме.

Сюймеклигими этерге ачыкъ,
Кёбден бери хазырма сеннге,
Алай а джукъ айталмайма базыб,
Огъай дерсе да деб меннге.

Къанатлы сюйгенча джазны келирин,
Джауум джауарын кырдык сюйгенча,
Мен термилеме сеннге, ант этейим,
Дуния къууанчха джюрек термилгенча.

Аузунгдагъы кюмюш тишчик
Мени кёзюме кёрюнед,
Кесинг айтхан бир эки сёзге
Акъылым бир бек бёлюнед.

Эскиле джуууб джайгъанма,
Къуруса, итиу урлукъма,
Письмонгу окъуб, картынга къараб
Къачаннга дери турлукъма?

Суу ызына нек чакъырдынг,
Кесинг ары келмей эсенг?
Сюеме деб нек алдадынг
Кёлюнг бла сюймей эсенг?

Нек ышардынг, меннге къараб,
Мени сюе билмей эсенг?
Нек къабдырдынг тузлу чабакъ,
Ызындан суу бермей эсенг?

Тауланы башы бир ариу болгъанды,
Ол алгъынлада къар эди,
Къарангы кечени нюрча джарытыб,
Бир сюйгенчигим бар эди.

Тауланы башы бир ариу болгъанды,
Ол гокка хансдан кийиниб,
Сюйгеним келе болурму, тенгле,
Бурнум къутурады,сюйюнюб.

Мындан къараб таныйма, къызла,
Таулагъа кюнню тийгенин,
Ах, иги сагъан, бир билир эди
Мени наным кимни сюйгенин.

Сен да сюесе, мен да сюеме,
Ашыгъыб айыб алмайыкъ,
Джазыуубуз бир боллукъ эсе,
Намысыбызны джоймайыкъ.