Чокъуракъ сууну кёксюл кёлюча,
Ала кёзлеринг ышара,
Къуш къанатлача, узун кирпикле
Ала кёзлени джашыра.

Хурзук тюзюнде гокка хансланы
Сен эгечлери боласа,
Оюнда, ишде, къызла ичинде
Хар джерге хурмет саласа.

Аяз къакъгъанлай, кёл чайкъалгъанча
Ала кёзлеринг ойнайла,
Джюрек тынчлыкъны алыб бошалла,
Энди джашаргъа къоймайла.

Бир кёб айландым, бир кёб джюрюдюм,
Мен сенден ариу кёрмейин,
Бу алакёзню къараб кёргюнчю
Мен сюймекликни билмейин.

Сени башынгда ол ариу чачынг,
Ол алтын окъа бургъанлай,
Тансыкъ болурум келе да турады
Кёзюнге къараб тургъанлай.

Сени юсюнгдеги ол ариу чепкенчик,
Ол джылан ала чапракъ,
Сен ариучукъну къалай да къаргъайым
Мени да ашасын топракъ.