Сизни юйюгюз узакъ тюлдю
Мен барама да къайтама,
Айыб этмегиз, мени тенглерим,
Тарыгъыуларымы айтама.

Тарыгъыуларымы айтыб башласам,
Бир джылдан алгъа бошамам,
Ой, былай энтда бир джылны турсам,
Адам инсаннга ушамам.

Мен адамгъа къалай ушайым,
Бетимде нюрюм къалмаса,
Дунияда башха сагъышым джокъду,
Джангыз ариуум болмаса.

Кечем да кюнюм да бир бек къарангыды
Билмейме тангымы атханын,
Кесиме ушатыб бир бек джылайма
Кюнюмю ингирде батханын.

Ой мен эшикге чыгъыб къарасам
Бир ариу аяз урады,
Сюймеклик ауруу къатымы сакълаб
Джанынгы бер деб турады.

Кече оруннга джатаргъа кирсем,
Къара къашларынг кёрюнед,
Табхан анам къатымда тургъанлай
Акъылым санга бёлюнед.

Эки кёзюмю къаты да къыссам
Ичинде сени кёреме,
Ой джана келиб джукъланнган джашау,
Санга джарыла ёлеме.

Сюеме дединг —кесинги сюйдюрдюнг
Сюймейме дединг — кюйдюрдюнг,
Сюймегенинге бушуу этмейме,
Бютеу тенглеге билдирдинг.