Кёкню къойнун къармай, джерни башын аулай,
Дунияны кёрген кёгюрчюн,
Сен Рамазандан келтир бир тюз хапар
Шо бу джол бир къыйнал мени ючюн.

Къолунгдан а келмей къаллыкъ тюлдю
Бюгюн аны кёрюб къайтыргъа,
Мен къайдагъысын а билмейме кесим да
Санга былай бар деб айтыргъа.

Украинада, Белоруссияда,
Бессарабияда соруула,
Рамазан бла аны нёгерлери
Аланы биринде болурла.

Кёкде кёк къузгъунну, сууда суу суусарны.
Джерде джекни кёрген кёгюрчюн!
Сен, Рамазаныма саламымы айта,
Бир къаты къучакъла мени ючюн!

Бу джашау деген а къалай сейир затды,
Джараусузну джукъгъа санамайд.
Тенг джашлары бары кетгендиле ары,
Тенг къызларындан а салам айт.

Ол да мени сорса, хапарымы айтырса,
Мен да кёргенингча турама.
Кюндюз ишле бла, кече тюшле бля
Кечине-кечине барама.

Кече тюшюмде боркъулдаб, къайнаб,
Къара тенгиз къызыл джанаед,
Ай да анга тюшюб, кёкню тубан этиб,
Кюйюб тауусулуб бараед.

Къара кече болуб, тутуш тубан толуб,
Бир чюйре джерде къалаем,
Мен Рамазанны кёрюрге термилиб,
Излеб ары-бери бараем.

Бек кёб изледим, джерни да тентиретдим,
Айланнган джеримде табмадым.
Не кюн джылтырар деб, неда ай чыгъар деб,
Иги мурат этиб сакъладым.

Сюнгюлери бла келиб солдатла
Къарангы кечени чачдыла.
Айны да, кюнню да миниб самолетла
Орунларына такъдыла.

Миллет да джыйылды, дауур да тыйылды
Чегет, суу да бирден джашнады.
Бир къызыл командир мийикге миниб
Халкъгъа сёлешиб башлады.

Айтыб да бошады, тюшюб да башлады
Барыб джауладан чёб юздю —
Бу джангы джашауну ачхычыды, — деди
Бир джылтырагъаннь. кёргюздю.

Андан кёзюм къамаб, тюз аллына къараб
Эсими джыйыб эснедим.
Мени бир джанымда ышара-ышара
Рамазанны эследим.

Чалкъы да чалама, дырын да джыяма,
Хорлам кюнюбюзню сакълайма.
Бу письмоланы уа кюннге бир джазама
Иерге уа адрес табмайма.

Ызына тебресенг, айтыргъа унутма сен
Къарачайны бетин джойма деб,
Мадары бар эсе, бек къаты тилерсе,
Джауну джик деригин къойма —деб.

Адамладан башха джанланы арасында
Барындан да ариу кёгюрчюн!
Къакъ къанатынгы, айт аманатымы,
Къулунг болурма ёлгюнчюн.