Ой, Къызыл Аскер барыб ачханды
Гитлерни тургъан юйлерин.
Кюн да, кече да айтыб джылайма
Джарлы Энверни кюулерин.

Мени Энверим келеди деселе
Къатапа джаярем джолуна.
Кюн да кече да къараб джылайма
Энверим, келлик джолунга.

Мени Энверим келеди деселе,
Акъ крепдешин киерем,
Ой, сени бла бир айны джашасам,
Дунияны мюлкюндон сюерем.

Сен письмо джазсанг, алай джазыучаненг
Булутладыла мени юйюм деб.
Мен Москвагъа джылаб барлыкъма,
Чыкъмай къалды джарыкъ кюнюм деб.

Къолума таякъ алайым, ой Энвер,
Темир чарыкъла киейим.
Киши элинде, худжу Берлинде
Къайда таш тюбюнде излейим.

Белоруссиягъа, Украинагъа
Бессарабиягъа барлыкъма.
Ой, мен къыйынлы, анда да табмасам
Джарылыб ёлюб къаллыкъма.

Стампулгъа барлыкъма, ой-ой Энвер,
Мен сени сорлукъма озгъаннга.
Сенден бир хапар табылмазмы эди
Кёк тенгизлени къазгъаннга.

Мени Энверим уча болур эди
Кавказда, мийик таулада
Ой мен къыйынлы, сени табмайма
Елгенле бла саулада.