Кёбле кёб тюрлю сёзле айталла,
Ий къайсы болур кертиси,
Мени джаууму юйюнден кетгеед
Къарнашларыны тёртюсю.

Ёлгенден сора къайгъым къалмайын
Джаным ахырыма джыйылды,
Сагъыш этигиз, тёртюсю огъай эсенг,
Бири кетген да къыйынды.

Сизни атыгъызны адамла айтсала,
Мени джызылдайды хар саным,
Бу къыйынлыкъладан бир къутулурламы
Мени Хусейим, Хасаным.

Сизни атыгъызны адамла айтсала,
Кюйюб къалады санларым,
Бу къыйынлыкъладан къачан къутулурла,
Мени къарнашларым — джанларым.

Атыгъызны айтсам алай болама
Сиз болгъан элге кетейим,
Биринг кюн чыкъгъанда, биринг кюн батханда
Ах, сизге къалай этейим.

Башсыздан къоркъгъан къоркъууум джокъ эди,
Къоркъгъан къоркъууума нек салдынг,
Джанынга къурман болайым, Алийим,
Былай башсыз болуб нек къалдынг?

Ай мен къыйынлы къалай этейим,
Къайсы джанына къарайым?
Ой джолда ёлюб къаллыкъ эсем да
Мен да сизни излей барайым.

Ой къарнашлары кёреем, мен джарлы,
Адамны тургъан къаласы,
Джарыкъ дунияны къарангы этген
Ой джаууму ёлсюн анасы.

Мени кёб къарнашым ой-ой да аз болгъанды
Бу Германияны кючюнден,
Ай джарлы Нюрчюк чыгъалмаймы къалдынг
Сен да джаннган отну ичинден.