Туура урушха дери джетдирдинг,
Тау чам бла бизни кюлдюрюб,
Поездде бара, сен джырлай эдинг,
Ачыкъ кёлюнгю билдириб.

Бютеу дунияны саулай башына
Биз тынчлыкъ джашау салырбыз,
Ит фашистлени тюк-тюк этербиз,
Геройлукъ атны алырбыз.

Кетиб барабыз, айланыб къарай,
Ой Къобан суугъа, таулагъа,
Кёкюрегибизде отча джанарла
Берген орденлери саугъагъа.

Бизни ишибиз тюзлюкдю, тенгле,
Биз тюзлюк ючюн ёлюрбюз.
Белгилерибизни къадама этиб,
Биз ойнай, кюле келирбиз.

Биз къазауатда кючлю илербиз,
Тауда ёсген джигер санланы,
Хорлам бла къайтыб чалкъы чалырбьи,
Кютербиз колхоз малланы.

Кирдик урушха Ата джурт ючюн,
Кёзге кёргюзе хар затны,
Дерт къайтармайын алай къоймазбыз
Бу халкъгъа джетген азабны.

Герман танкала гюрюлдеб келелле
Окопаланы юсюне.
Ёмюрде киши бир джукъ эталмаз
Бизни къралны кючюне.

Джерни танкала, кёкню самолет,
Тобла да бирден аталла,
Алай а бизни ёхтем аскерле
Заманны мараб джаталла.

Заман джетгенлей, команда болду
Джауну джууабын берирге.
Ол къан ичгенле умут этмесинле
Бизни онгсузгъа кёрюрге.

Бизни самолётла, бизни танкала,
Катюшала да атдыла.
Ол бизге ёшюн уруш этгенле
Бери къобмаздан джатдыла.

Биз алгъа кетиб бара тургъанлай,
Баргъан полкубуз тыйылды.
Джауну дзотлары бардыла алда деб
Военный совет джыйылды.

Таулу къан къайнайд алгъа барыргъа
Сен алгъа тутдунг къолунгу.
Ёшюнюнг бла дзотну джабыб,
Ачыкъ этерге джолну.

Къаты къучакълаб мени бойнумдан, —
Сеннге аманатым барды-деди,
Джырымы мындан ары сен элт, деб,
Меннге борч салыб тиледи.

Ёхтем ёшюнюнг барыб къабланнганлай,
Дзотдан атылгъаны тыйылды.
Тенгиз чайкъалыб алгъа ургъанча,
Полк да аллына къуюлду.

Эки къат герой дедиле, тенгим,
Ол кюнден сора атынга.
Джигитлигинги юсюне джазыб,
Сын таш салдыла къатынга.

Ол кюн ант этиб биз къабыр къаздыкъ,
Сени къанынгы алыргъа,
Бизни полкубуз къаты сёз берди,
Сеннге памятник салыргъа.

Джауну тамырын тюб эте, тенгим,
Германиягъа джетгенек,
Сен джырларынгда айтхан затланы
Барын да разы этгенек.