Къарачайны къаблан кёллю уланы,
Миннген атынг къурчдан кючлю къадамад.
Уруб ётдюнг Днепр, Дунай сууланы
Узакъ джерге элтди узун къазауат.

Танка полкунг джолгъа чыгъыб тебресе,
Джер тебрениб, кёк тебиниб башлаед.
Урушлада джаугъа тюбеб сермесе,
Тобдан атыб джанкъылычла джасаед.

Не кечеле, къаллай кюнле ётдюле...
Джайла, къышла талай кере келдиле.
Аскерлеринг къызыл къанла тёкдюле,
Кёб эллеге ала эркинлик бердиле.

Кёкюрегинг джулдузлача джашнайды
Кърал берген орден, медал саугъадан,
Ана джуртунг сени аллынга къарайды
Эм береди салам Кавказ тауладан.

Сен асландан юлгю алыб джаш тёлю,
Тау халкъынгдан кёб батырла чыгъарбыз,
Биз миллетни джигит туугъан ётгюрю
Эм аллына сени атынгы джазарбыз.

Батыр Татаркъанны ёхтем туудугъу,
Тукъумунгда баред сени джигитлик.
Берлиннге дери сен джауну къуудунг,
Багъатыр улу гвардиячы полковник.