Сени ариулугъунг тамам ушайды
Тийген кюнюме джарытыб,
Бетинги нюрю кюннге эришеди
Аныча кесин танытыб.

Сени ариулугъунг тамам ушайды
Мартда чыгъыучу джанкъозгъа,
Джашиллик хорлаб, джашауну онглаб,
Джерге нюр салгъан джазгъа.

Сени ариулугъунг тамам ушайды,
Кече чыгъыучу толу айгъа,
Кёгетле бише, сабанла джете
Зауукъдан толгъан кёк джайгъа.

Сени ариулугъунг тамам ушайды
Кёкде джаныучу джулдузгъа
Сууда джашаучу, андан чыгъыучу
Ол джылтырауукъ къундузгъа.

Сени ариулугъунг тамам ушайды
Къобанда ала чабакъгъа
Кёз къаматыучу джети бояулу
Нюрлю джанкъылыч таякъгъа.

Сени ариулугъунг тамам ушайды
Кёкбоюн акъ кёгюрчюннге
Бетинги акълыгъы бир бек ушайды,
Билезиклик акъ джюннге.

Сени ариулугъунг тамам ушайды
Акъ чакъгъан балий терекге,
Аузунгдан чыкъгъан ариу сёзлеринг
Балча джагъылалла джюрекге.

Сени ариулугъунг тамам ушайды,
Кёк садда чакъгъан хансчыкъгъа,
Чемер суратчы кёл ашаб салгъан
Суратда ариу джанчыкъгъа.