Эй, сенден ариу кёрмедим, Кулина,
Ой мен джашагъан джуртлада.
Сеннге ушатыб, гокка хансланы
Басмай джюрюйме сыртлада.

Эй, сенден ариу кёрмедим, Кулина,
Да мен айланнган элледе,
Саннга ушатыб сапран чабакъланы
Излеб айланама кёлледе.

Эй, санга кимле да не айтадыла
Ой, мени ариу Кулинам,
Сюйрелгенинги да мен эштгенимде
Къарангы болду дуниям.

Да санга кимле да не айтадыла
Кулинам, юйюнг къурурукъ,
Ой Кулинамы манга къоймайды
Бу шайтанаякъ гугурук.

Эй джангур джаууб кюн тийсе джылтырайд
Огъары Мараны ташлары
Ма Кулинамы да манга бермейле
Къанлы Мараны джашлары.

Сени аягъынга тармы болалла
Тюкенден алгъан галошла,
Ой сени былай кётенли этген
Марада битген гардошла.

Эй сенден сора болурму, Кулина,
Биринчи майда акъ кийген,
Эй менден тели болурму, ой джашла,
Сау джети джылны къыз сюйген.

Не кюрешсем да дарман табмайма
Кулина салгъан джарагъа.
Ах иги сагъан, тюшюб къалгъа эдим,
Кулина болгъан Марагъа.
17/