Къарангы тубан басханды
Дальний Востокну ара шахарын,
Сау алты джылны сюйгеними
Алгъанма ёлген хапарын.

Ёлген хапарын айтыб келдиле
Тенг джашларыны ючюсю,
Наным, джанынга къурман болайым
Джети къарнашны кичиси.

Ёлген хапарын эшитгенимде
Ызыма эки атладым,
Къызыл Армиядан келлик болур деб,
Сау алты джылны сакъладым.

Мени осият этиучю ананг
Келинлерине джюк болду,
Алты къарнашны ичинден чыгъыб,
Мени кёзбауум тюб болду.

Сени ананга кесим къарарма,
Келинлерине бермезме,
Ой Россиягъа айланыб келсем да
Мен сеннге ушагъан кёрмезме.

Мени кёзбауум ёлгенди дейле
Джарыкъ дуниядан тас болуб,
Энди Къарачайгъа адам ёсерми
Сеннге ушагъан джаш болуб.

Сау алты джылны тилегенем,
Къабыл болмады тилегим,
Тенг джашларынг накъырда этселе
Таралыб ауруйду джюрегим.