Багъырбаш джылан келеди,
Аллыбыз сыртны джол этиб,
Сюймегенинге беребиз дейле.
Ой, адамларым зор этиб.

Сюймегениме бергенден эсе,
Джанымы саулай алыгъыз,
Ол ишни этерик, ой, мен тюлме,
Къабырыма саулай салыгъыз.

Насыбы болса адамны къызы,
Сюйгенине кетеди,
Джети къанлым атасыз болсун,
Тюбеген оноу этеди.

Къая джанына, ой, таш джанына,
Мени къысдырыб къойду эсе,
Энди ох десин, ай джарлы анам,
Керексиз джерге джойду эсе.

Джууугъум, тенгим къалмалла,
Бу ишде мени маралла,
Сюймегенинге беребиз дейле,
Манга не айтасыз, аланла.

Къарнашчыкъларым менден тилейле
Бизге билдирмей кетме деб,
Ой, джарлы анам алай тилейди,
Сен муратынга джетме деб.

Къарнашчыкъларым алай айталла,
Сен сюйгенингден къалма деб,
Биягъы анам алай къаргъайды,
Сен анга барсанг онгма деб.

Мени джети къанлыма
Сюймеклик ишни сынатма,
Энди боллугъунг болгъанды,
Медина, Сабийчигинги джылатма.

Меннге этилген артыкълыкъны,
Чыртда болалмайма кёлтюрюб,
Мара суула Къобан болсала,
Бериб кетерем секириб.

Ишлеген джашды, иги джашды дейле,
Ой, джюрегими джаралла,
Ангылары болмагъан къызла
Баш баулулагъа баралла.

Баш баулулагъа баргъандан эсе
Джанымы ёлгюрюб алыгъыз,
Сюймегениме бергенден эсе,
Къабырыма саулай салыгъыз.

Нанымы атын сагъынсагъыз,
Санларым къалады къыйылыб.
Сюймегенинге беребиз дейле,
Ой адамларыбыз джыйылыб.

Бу ишни меннге сагъыннганла,
Сиз бир къыйынлыкъ сынагъыз,
Тарала кетген джарлы Медина-деб
Тенглерим, меннге джылагъыз.

Джууугъум, тенгим къалмалла,
Бу ишде мени маралла,
Ангылары болмагъан къызла,
Туура менлей эрге баралла.