Кёкде баргъан кёксюл кёгюрчюн,
Бурулуб тюшдю тенгнзге,
Айт деб айтдырыб, хиликге этмегиз,
Инарла айтайым мен сизге.

Сени къолунгда къобузунг, къызчыкъ,
Аны тиеклери уакъды,
Тарыгъыуларыма тынгылагъыз, тенгле,
Къуран окъугъандан сууабды.

Тауланы башы къаралыб турады,
Басыныб джангур джауаргъа,
Ой, сен ариучукъ, къайдан кёрюндюнг,
Мени санларымы къыяргъа.

Ах деб ахсыныб, кёкге къарасам,
Мыдах боладыла булутла,
Атынгы айтыб джерге къарасам
Муал боладыла кырдыкла.

Тауда гокка хансны къучакълайма, ариу,
Сени тюрсюнюнге ушатыб,
Джанымы санга алыб берликме,
Джаш джюрегими бошатыб.

Тангны аллы бла сизни башыгъызда
Бир къара илячин къычырсын,
Аллыгъыз бетден, къара чегетден
Алтын мюйюзлю буу чыкъсын.

Сени аллынгда сюелиб турсам да
Мени джюрегими билмейсе,
Мен сени сюйюб ёлюб барсам да,
Сен ышармайса, кюлмейсе.

Ой мен, джашла, башымы тутама,
Тауладан акъгъан суулагъа,
Джюрек джарамы ачыб кёргюзтеме
Чегетде айланнган буулагъа.

Кёкде баргъан кёксюл кёгюрчюнле,
Бери къайта кетигиз,
Мени сюйгениме джаш джюрекден
Сюймеклик салам элтигиз.

Къыз джюрегимден сени тилейме,
Манга бир сюймеклик сатсанг а,
Мындан кёб термилтмей, ариу,
Мени сюе эсенг айтсанг а.

Кёкде джулдузну алыб берликме
Санга сюймеклик саугъагъа,
Сени сюйгенли кийик болгъанма,
Кавказда мийик таулагъа.

Тауну башында, чегет баурда,
Кийик маралла ойнайла,
Кече болса, сени кёзлеринг,
Мени джукъларгъа къоймайла.

Ол юсюнгдеги костюмунг,
Ол узун эсе кесейик,
Аллымда уллум барды дей эсенг,
Бир-эки джылны тёзейик.

Кёкде баргъан къанатлыла
Сюймекликден письмо атсынла,
Эки джюрек бир-бирин сюйселе,
Ала бир-бирин алсынла.

Мен сюйгенча, сен сюе эсенг,
Сен белги бере барсанг а,
Сюймекликден тюшген ауур, джараны
Мени джюрегимден алсанг а.

Мени къолумда къол джаулукъчугъум,
Санга берейим, кёре тур,
Сюйгеним дерге уяла эсенг,
Къарнашчыгъым де да, келе тур.

Сен да сюесе, мен да сюеме,
Бери тутдурчу къолунгу,
Ой, мени ариучугъум, къачан билликме,
Юйюгюзге соруб джолунгу.

Санга дарманнга тутуб келтирликме,
Къара тенгизни къундузун,
Ай, иги сагъан бир билир эди
Джазыу боллукъ джулдузун.

Башынгдагъы чилле джаулугъунг,
Чачагъы сайын токъмагъы,
Бизни юйге кетиб турады
Ариу гокканы сокъмагъы.

Джюр, ариучугъум, алыб кетейим,
Кийик отлаучу таулагъа
Ёлгенле сени келиб алмазла,
Мен да бермем саулагъа.

Кёзюмю алмай бир кёб къарайма
Суугъа джюрюучю джолунга,
Ах, сени къайдан сюнгенем, ариу,
Сабий башыма къайгъыгъа.

Мен айтыб тургъандан не хайыр барды,
Акъылымы кесинг билирсе,
Не мен айтханны сен да айтырса,
Не хыликге этиб кюлюрсе.

Мени, ариу, алай термилте эсенг,
Ёмюрюнг къысха болгъа эди,
Ариу суугъа салгъан кюмюш челегинг,
Кир да джангурдан толгъа эди.

Сени сюеем, сакъламадынг, ариу,
Мени унутуб къойгъанса,
Дуния термилген ариу сыфатынгы,
Кёз къарангы этиб джойгъанса.

Толгъан айны юсюн джабхан,
Джангур булутду къаралтхан,
Джаханим отха саулай кирсин
Бир-бирибизге гаралтхан.

Сени сюйгенли алай болгъанма,
Анамдан джангы туугъанча,
Мени къоюб къайры бараса,
Ызынгдан адам къуугъанча.

Айны булут басыб турады,
Ортасындан узун къаралыб,
Джаш джюрегим ауруу табханды,
Сени ызынгдан таралыб.

Мийикде таула, уллу чегетле,
Тёгерегибиз къая, джар,
Сен, ариу, кетиб бара эсенг,
Джанымы кесимде къоя бар.

Тылпыуум кёкде тубан болады,
Ах, ичим къара кюйгенден
Эки кёзюмю къакъмай къарайма
Джюрегим кемсиз сюйгенден.

Джер — тёшегим, таш — джастыгъым,
Чегетде ингирге джетеме,
Мен кенгден къараб, кёлекгенги кёрюб,
Анга къууана кетеме.

Къалайгъа къараб сагъыш этейим,
Кюнюм алайда кеч болур,
Сюйгени болгъанны сынай туругъуз,
Ол ахсыныргъа ёч болур.

Мени тюбюмде тору атым,
Бир толу болсун муратым,
Сен мени къоюб башханы сюйсенг,
Бузулсун ариу суратынг.

Сенсе деб бир кёб къарайма
Кёкде баргъан къушлагъа,
Санга таралыб бир кёб джыладым,
Олтуруб мийик ташлагъа.

Мийик ташха олтуруб сагъыш этдим,
Ол сагъышларым кетерле,
Сен да манга келиб, мен да сени алыб,
Емюрюбюз бирге ётерми?..

Санга термиле кёб сагъыш этдим,
Энди сагъышларым чачылсын,
Таралыб тургъан джюреклерибиз
Бир-бирлерине ачылсын.

Сени башынгда къара чачынг,
Аны къолунг бла сылагъын,
Мени къоюб башханы сюйсенг
Сюймеклик ауруу тийиб джылагъын.

Элибизден мен да бардым
Сынтыны уллу тоюна,
Менден башханы сен сюйсенг,
Къызыл джылан чырмалсын бойнунга.

Элигизге барсам сени кёрмей,
Арбазыгъызгъа бир кёб къарайма,
Сюймеклигими, санга билдиралмай
Ызыма айланыб барама.

Мен сени сюеме, сен да мени сюйюб,
Толу муратыбызгъа джетейик,
Мындан кёб термилтме мен джарлыны,
Келчи, бизни юйге кетейик.

Сен къайры барсанг. мен да ызынгдан,
Баргъан джеринге барырма,
Сени сюйдюм, ариу, энтда сюерикме,
Умутум сени алыргъа.

Сыртха айланыб мен тебресем,
Бир ариу джерледен ётеме,
Кече тюшюмде сени кёрюб,
Алыныб кетерге джетеме.

Минги тауну башы бузла,
Зримей кёб джылла джатады,
Санга термилиб кече сайын,
Тангым аман бла атады.

Сени ариулугъунга къараб турсам,
Тоймайды мени кёзлерим,
Чыртда зсимден кетерге унамайды,
Сени тойда айтхан сёзлеринг.

Эки джаным болса, ариу,
Бирин санга берирем,
Бир картчыгъынгы меннге берсенг,
Сени кёзюнгден кёрюрем.

Джаш бла къызны тоюнда ариу
Тебсейдиле, харе уруб,
Отоу юйде сен да турурса,
Келин болуб, къубулуб.

Ёрге айланыб, чыгъыб тебресем,
Арыб тохтайд мени атым,
Сюйюб сени алырма деген
Барды кёлюмде муратым.

Сени буунунгъда сагъатчыгъынг,
Ол да бир кюн чачылыр,
Сюймеклик ауруу башынга тюшее,
Джюрегинг манга ачылыр.

Кёкде баргъан къанатлыла,
Ала учалла айланыб,
Не кюрешеем да айыралмайма,
Джюрегим санга байланыб.

Сени сюйгенли бир ауруу тийгенди,
Мен джюрегимден ёлеме,
Былай термилтмей ал да кетчи,
Джанымы сеннге береме.

Эртден сайын къарайма,
Суугъа барыучу джолунга,
Мен сеннге бир бек таралама,
Аджалсыз ёллюк болурма.

Экибизни, ариу, тоюбузда
Тебсерле къызла эм джашла,
Сени атынгы айтыб джырласам,
Къошулалла чегетде агъачла.

Кечеги тойда, кюбюрчек оюнда
Къыз, джашла бир-бирин тюелле,
Мен сени сюйюб ёлюб барама,
Сен къайсы джашны сюесе?

Эртден сайын мен къарайма
Суу алыучу джолунга,
Тойгъа келликди сюйгенчигим,
Мен да кёрлюк болурма.

Сен да суугъа барсанг, ариу,
Челеклеринг суудан толурла,
Бир аман тюшле кёреме,
Сюйреб кетерик болурла.

Энтда сен суугъа бараса,
Суу алыб дженгил къайтырса,
Къанатлыдан письмо иерме,
Джууабын кесиме айтырса.

Сюймеклик къайгъы бир аман термилтди
Юсюме джангур джаугъанча,
Сен ариучукъдан джууаб алсам,
Болур эдим джангы туугъанча.

Юсюнгдеги чепкенчигинг, ариу,
Джюрюсенг бир ариу къалтырайд,
Ол ариу къара дугъум кёзчюклеринг,
Джулдузчукълача джылтырайд.

Меннге да письмо келгенди,
Ызына дженгил къайтардым,
Къанатлычыкъ аллыма тюбеб,
Сюймеклик саламла айтдырдым.

Къара джерге къар джауады,
Джерни чыммакъ агъартыб,
Къайры кетиб бараса, къызчыкъ,
Мени ызынгдан таралтыб.

Мийик кёкде самолёт барады,
Кюн тийсе, джылтырай, агъара,
Сюйгенчигим юйде тынч турады,
Мен да анга тарала.

Кюндюз болса санга тарала,
Джырлайма къаяны юсюнде,
Кече джукъларгъа къоймайса, ариу,
Хаман да келиб тюшюмде.

Ариучук эсиме тюшген заманда,
Аякъларым басмай тохтайды,
Аны кёзчюклери кёзюме кёрюнюб,
Кече джукъларгъа къоймайды.

Кел, ариучукъ, ийнар айтайыкъ,
Кимни тарыгъыуу кёб эсе,
Сюйгени болуб джашыргъанны сора,
Сюйгени ёлсюн алесе.

Сен доктор болуб, мен ауруб барыб,
Мадарынг болмаса къарамай,
Мен кёз туурангдан кетерге унамай,
Дарманларынг манга джарамай.

Эл сейирсинеди, тамам ариуса да,
Чыдаялмайма къарамай,
Орамыгъыз бла озуб барама,
Дауурунга джаным чыдамай.

Мен, тенгле, джюген салгъанма,
Тау артындан аугъан эгерге,
Сени, къызчыкъ, алыб кетерме
Терт саныма нёгерге.

Къарнашчыгъынгы айтхан сёзлери
Мени джюрегиме джарады,
Ананг, къызымы бермейме дегенча,
Туурмадан келиб къарады.

Ой, кёкде баргъан кёксюл кёгюрчюнле,
Бери къайта кетигиз,
Мени ариуума мени джюрегимден
Сюймеклик салам элтигиз.

Мийик тауда, чегет бауурда
Кийик маралла ойнайла,
Кече болса, сени кёзлеринг
Мени джукъларгъа къоймайла.

Кёзлеринг къара, къашларынг къара,
Тенгизни къара къундузу,
Сени сюймейин кимни сюейим,
Дунияда джарыкъ джулдузну.

Кел, экибиз да кетиб къалайыкъ,
Экибиз сыртдан ауайыкъ,
Сен тубан болуб, мен джангур болуб,
Бир къарангы кече джауайыкъ.

Мени тюбюмде тору атым
Толу болсун муратым,
Мени къоюб башхагъа барсанг,
Бузулсун ариу суратынг.

Къызланы ичинде ой сен ариуну,
Ары-бери къараб излейме,
Манга тийген ауруу санга тийсин,
Джаратхан аллахдан тилейме.

Джюрегими бир джери ауруйду,
Кёкюрегими сыласам,
Терекле ауалла, булчукъла агъалла,
Атынгы айтыб джырласам.

Юйюбюзню артында балий терекле,
Анга кёгюрчюнле бугъалла,
Мени кибик сабий адамгъа,
Ийнарла джерден чыгъалла.

Зртден сайын туруб къарайма,
Аллыбызда Кавказ таулагъа,
Сени сюйгенли ауруулу болгъанма,
Къошулалмайма саулагъа.

Сени ариулугъунг энди, кукачыкъ,
Акъ кёгюрчюннге ушайса,
Орамгъа чыгъыб, джюрюб тебресенг,
Джюрегими джауун ашайса.

Мени джюрегими ауруу басханды,
Дарман ичсем да ачылмай,
Сени кишиге бермезме ариу,
Джюрегими къаны чачылмай.

Айдан джарыкъ джаякъларынг,
Джюрегиме джара салады,
Чыдаялмайма сени кёрмесем,
Джюрегим кюйюб барады.

Бир кёб айла.ндым, бир кёб джюрюдюм,
Мен сенден ариуну кёрмедим,
Бу алакёзню къараб кёргюнчю
Мен сюймекликни билмедим.

Мени къолумда къол джаулукъчугъум,
Аны мюйюшлери тёртгюлле,
Кеси башыма эркинлигим джокъду,
Оноучуларым кёбдюле.

Терезелени ары ачыгъыз,
Бир ариу аяз урады,
Сюймеклик ауруу къатымы сакълаб,
Джанынгы бер деб турады.

Терезелени ачыб къарасам,
Джюрюген джолунгдан тыярма,
Ийнарларымы айтыб башласам,
Сени санларынгы къыярма.

Чакъгъан хурмача кече тюшюмде
Кёзюмю аллында тураса,
Джулдузладан саугъа алыб берликме,
Сени кёлюнге джараса.

Кёзюмю къысыб, къамата ачсам,
Ала кёзлеринги кёрюрме,
Сени табмасам, гокка ханслагъа
Сени ючюн салам берирме.

Джаз суулу тал чыбыкъчыкъча,
Субай санларынг ийиле,
Ариу бойнунга Джохар чачынг
Бурма булутча тёгюле.

Тюбюмде атым мыдах болады
Айры къамчи бла ургъанлай,
Санга аман къалай болайым,
Сени амалтын ёле тургъанлай.

Мангылайынгдан чыкъгъан бурма чачынг,
Къара джибекни бургъанлай,
Тансыкъ болурум келе турады
Кёзюнге къараб тургъанлай.

Къызланы ичинде джылтыраб тураса,
Толгъан айча джаннганлай,
Ой, мен джарлыны нек термилтесе
Башха сюйгенинг болгъанлай.

Сени сюйгенли болгъанма, ариу,
Эшикден юйге киралмай,
Къалай кёб къыйналдым, ариучугъум,
Сени кёлкдагю билалмай.

Мен ийнарла айта билмейме, ариу,
Ийнаргъа атым чыкъгъанды,
Сюймеклигибиз бир болуб,
Джазыуубуз къайда букъгъанды.

Сен суудан келе тураса, ариу,
Суу челеклеринг толуду.
Саулай къызладан сайлаб сюеме,
Дунияда сенден ариу болурму?

Кел, экибиз суугъа барайыкъ,
Экибиз бирден алайыкъ,
Сен келин болуб, мен кюеу болуб,
Бир-бири юйюбюзге барайыкъ.

Тауланы башы тау эди, анам,
Ол алгъынлада къар эди,
Къарангы кечени кюнча джарытхан,
Мени сюйгенчигим бар эди.

Тауланы башы тау болса,
Мен джалан болуб ётерме,
Мени ариуумдан хапар айтханнъга,
Джанымдан юлюш этерме.

Сени юсюнгдеги тыйын пальточугъунг,
Таймаздан аны киесе,
Тышынгдан сюймейме десенг да, ариу,
Ичингден мени сюесе.

Мен ийнар айта турама, тенгле,
Кюйген джюрекге джарайд деб,
Сен, къызчыкъ, алай умут этесе,
Саулай дуния къарайд деб.

Сенден арнуяу кёрмедим, къыз,
Мен айланнган джуртлада,
Санга ушатыб джыйыб айланама,
Гокка хансланы сыртлада.

Сенден ариуну кёрмедим, ариу,
Мен айланнган элледе,
Санга ушатыб къараб айланама
Ала чабакълагъа кёлледе.

Сюеме дединг — сюйдюрдюнг, къыз,
Сюймейме дединг — кюйдюрдюнг,
Кечеги тойда кюбюрчек оюнда
Сюйгенинги билдирдинг.

Ариу да дейле, эрши да дейле,
Джюрек сюйген ариуду,
Кёрюрге джюрегим сюе тургъанлай,
Кёрсем, джюрегим ауруйду.

Къараб кёргенлей сюеме, ариу,
Ол эки къара къашынгдан,
Сени амалтын кетиб барама
Джарыкъ дунияны башындан.

Кёкде баргъан къаргъала, тенгле,
Къалмай барысн да къарала,
Былай этиб ёлюбмю къаллыкъма,
Сюйгенчигим деб тарала.

Мени сюйгеним тойгъа келмейди,
Ол тойгт-а келсе кёз болад,
Къатына олтуруб бир джукъ айтыргъа
Худжу тийреде сёз болад.

Сюйгенчигим берген къолджаулукъ,
Аны арасында аласы,
Ариу Ленаны сюймей не этейим,
Алтын тауукъну баласы.

Башыбызда къара къаяла,
Кёк кёгюрчюнле ойнайла,
Эки къара къашынг, ала кёзлеринг,
Мени джашаргъа къоймайла.

Ой, башыбызда дагъыда къаяла,
Ала бир-биринден алаша,
Кел, экибиз да бирге болайыкъ,
Къалгъанла барырла джараша.

Эртден сайын туруб къарайма,
Суугъа барыучу джолунга,
Алтын джюзюк болуб къалгъаем,
Мен тутуучу къолунга.

Къууанч кюнюмде, мыдах кюнюмде,
Атынгы айта турама,
Мийик булутлагъа, джарыкъ джулдузлагъа,
Сени хапарынгы сорама.

Мен сизни элге тойгъа келгенем
Бир-эки тепсеб къайтыргъа,
Джыр къабчыгъым юйде къалгъанды,
Билмейме нени айтыргъа.

Джыр айтдырмай къоймай эсегиз,
Джыр къабчыгъыма къайтайым,
Сыйынмагъаны хурджунумдады
Айт дей эсегиз, айтайым.

Айт дей эсегиз, да мен айтайым
Сюймеклигими джашырмай,
Юйдеги этерге таукел болгъанма,
Заманны зыраф ашырмай.

Сени сюйгенинг ушайды дейле
Бу накъут бла налмазгъа,
Мен ант этиб бегитгенме, ариу,
Сенден башханы алмазгъа.

Сюеме дейсе, сюймейме дейсе,
Сени къалайынгы да билмейме,
Ой, менден башха сюйгенинг бар эсе,
Бар, гюнахынга кирмейме.

Накъырда этсем, урушхан этесе,
Аны бла алмачы эсими,
Мен сени ючюн ёлюб къаллыкъ эсем,
Бир сынарыкъма кесими.

Тау тюзледе гокка хансланы
Сен эгечлери боласа,
Оюнда, ишде, къызла ичинде,
Хар джерге хурмет саласа.

Аяз къакъгъанлай, кёл чайкъалгъанча,
Ала кёзлеринг ойнайла,
Джюрек тынчлыкъны алыб бошалла,
Энди джукъларгъа къоймайла.

Кюн да тиеди тау башлагъа,
Сени нюрюнге эришиб,
Ингирге дери джетиб къалама
Тюрсюнюнг бла сёлешиб.

Бир-зки инар, ах, мен айтайым,
Къаллы сюймекликни юсюнден,
Инарла джырла джарыб чыгъалла,
Джара джюрегими ичинден.

Сюймеклик ауруу, бу худжу ауруу,
Сау санларымы тарайды,
Джаууму болсун быллай сюйгени,
Ким озса, анга къарайды.

Ах, сюйдюм, сюйдюм, мен болалмадым,
Энди ызыма къайтама,
Былайым десем къалай билмейсе,
Джаш джюрегиме айтама.

Сюймеклик ауруу, бу худжу ауруу,
Джан тамырланы тартдырад,
Джаууму болсун быллай сюйгени,
Айтмаз сёзюнгю айтдырад.

Къайсы джанындан чыгъарса, наным,
Къайсы джаныма къарайым,
Ах, толгъан айгъа ушагъан наным,
Джанынга къурман болайым.

Юсюнгдеги кёлегинг, наным,
Тюрлене турады дарийча,
Къайгъыларымы чачыучан эдинг,
Джангы тилленнген сабийча.

Хар эртден, ингир чыгъыб ойнайды
Къара тенгизни къундузу,
Мени ариуум, къайдан келесе,
Рамазан айны джулдузу.

Къолумдан алыб джюрегиме салды
Джаннган отну кёмюрюн,
Сеннге термнле, сеннге тарала,
Кетерик болурму ёмюрюм?

Ах, мени наным ушайды, къызла,
Таулада битген сиреннге,
Сюймеклик ауруу къалай къыйынды,
Кетиб барады тереннге.

Къара къашларынг, къара кёзлеринг
Джюрегиме ауруу береди,
Кече да, кюн да бир да тохтамай,
Тауушунг къулагъыма келеди.

Мени миннген атым атлаб барады,
Аллыгъыз сыртны солумун,
Сиз тынгылагъыз, мен айтайым
Джаш джюрегими болумун.

Айт дей эсегиз, мен да айтайым,
Ийнарларымы башындан,
Мен сени сюйюб башладым, ариучукъ,
Ол эки къара къашынгдан.

Мен къарасам, сен къарама,
Эси болгъан айырыр,
Бу экисинде бир палах барды деб,
Саулай тийреге джайылыр.

Джанымы джартысын сен алгъанса,
Джюрек джаууму ашайса,
Бу къыйынлыкъны къайдан салдынг,
Мен джарлыдан бошайса.

Мен ийнар айтыб, нени айтайым,
Ийнар айтыргъа билмесем,
Ий.нар айтырым мени келмейди,
Къаракъашымы кёрмесем.

Ой, бармагъымда мени джюзюгюм,
Ах башы алтын, тюбю таш,
Сюйген джашымы танымаймысыз,
Бир къара къашлы узун джаш.

Къара къашлары мени нанымы
Джюрек джаууму ашайды,
Тургъан элинден аджашыб келиб,
Бир джарыкъ джулдуз джашайды.

Кёкде къанатлы, джерде къумурсха,
Джанымдан джарлы болурму
Юренчек болуб, салыб джылайма,
Мен джюрегиме къолуму.

Къара къашларынг, ала кёзлеринг,
Джюрек джаууму ашайла,
Ох, сенден келген къуру письмола
Мени не кюнюме джарайла.

Кёзюнге къараб къалай айтайым,
Сюймеклигим барды сеннге деб,
Саулай джамагъатха джылаб чыгъарыкъма,
Бир мадар болсун меннге деб.

Къолумдагъы кюмюш белибауум,
Белиме къыссам джылытхан,
Атама-анама разы тюлме,
Сюймекликни меннге сынатхан.

Мени къолумдагъы джюзюгюм,
Ол бармагъымы бек буусун,
Сенден сюйгеним джокъду,
Джашар кюнлеринг кёб болсун.

Мени къолумдагъы сен берген къол джаулукъ,
Аны бууунума байладым,
Кёб джерге айланыб, кёб джерде болуб,
Джангыз сени сайладым.

Эртден сайын чыгъыб къарайма,
Аллыбыз Кавказ таулагъа,
Мени наным Армиягъа кетгенди,
Орден аллыкъды саугъагъа.

Аллымда чалкъы чалсанг,
Ызынгдан дырын джыярма,
Туурангдан олтуруб, ийнарла айтсам,
Борбайларынгы къыярма.

Мен сеннге тансыкъ болуб, сагъыш этсем,
Кече да кюн да азама,
Джюрегим ауруб, къолум къалтыраб
Сюймеклик письмола джазама.

Ийнарла дейле, ийнарла дейле,
Быладан джокъду бир къарыу,
Акъылы болгъан ичинде тыяды,
Кимде да болады бу ауруу.

Ийнарларымы айтыб тебресем
Борбайларынгы къыярма.
Сюймеклигими айтыб джырласам
Барлыкъ джашынгдан тыярма.

Ах, сеннге письмо джазарыкъма, джаным,
Сау тетрадны толтуруб,
Сюймеклигими айтыб тебресем,
Джыларса къатыма олтуруб.

Джашлай сюйгенме сени, ариучукъ,
Джаш санларымы къыйдырыб,
Сабий санларымы саулай эритдинг,
Кесинги меннге сюйдюрюб.

Мен ёлмей дунияда джашасам,
Этген муратыма джетерме,
Ма бу эки-юч ийнарчыкъны
Ариуум, сеннге этгенме.