Къурт да, къумурсха да чыгъады уясындан,
Малла да чыгъалла бауладан,
Мени джюрегими джылытмагъан джазгъы кюн,
Бузланы эритеди таулада.

Джанымдан эсе да сюйген окъууму,
Энди окъумайма, атама,
Джашлай да кесилген бусакъ терек кибик,
Ауруб больницада джатама.

Джатхан палатамы да терезелери,
Кече да, кюн да джылтырайд,
Къалтырамай диктант да джазыучу къолларым,
Дарман къашыкъ бла къалтырайд.

Кече тюшюмде суратынгы кёреме,
Дженгил ташайыб кетеди,
Сылаб-сыйпаб тутуучу чачым
Энди дарман ийис этеди.

Эки ауруу алыб джюрегими,
Эки къыйынлыкъ сынайма,
Джарыкъ стаканда акъ дарманлада
Мен сени излеб къарайма.

Меннге бир дарман табылырмы эди,
Джерни джети къатын къазгъаннга,
Ёлмесем мен да унутмаз эдим,
Сюйгенимден хапар джазгъаннга.

Ой кюйюб-бишиб ауругъан джюрегим
Сени сагъынсам сорушад
Дарман къашыкъны тутмагъан къолум
Письмо джазаргъа болушад.

Терекле башында айланнган эркин джел
Аланы бир-бирине урады,
Къалгъанын чакъдырырча урса, аланы
Бирин къуу этерча урады.