НАРТЛА! МАЛКЪАР - КЪАРАЧАЙ НАРТ ЭПОС
НАРТЫ! ГЕРОИЧЕСКИЙ ЭПОС БАЛКАРЦЕВ И КАРАЧАЕВЦЕВ

ТЕКСТЫ

IV. ДЕБЕТ — АЛАУГАН — КЪАРАШАУАЙ

Къарашауай бла Гемуданы кёп хапарлары барды, аланы барысын да айтып бошаргъа бек къыйынды. Ала бирге кёп жигитликле эте келип, ахырында Минги тауну тюбюне баргъандыла да, Гемуда:

— Мен былайдан энди ёрлеп кетеме,— дегенди.— Аллах алай буюргъанды. Минги тауну башына чыгъарыкъма. Хайда, сен а энди къайт, Къарашауай, сюйгенинглей жашарса,— деп, алайда саламлашып, жиляп экиси да, Гемуда учуп кетеди.

Минги тауну тёппесинде айрысы барды. Аны Гемуданы туягъы тийип этген эди, дейдиле. Минги тауну башында шауданчыкъ болгъанды да, дей эдиле. Энди жокъду ол шауданчыкъ. Шауданны эки жанында эки жипи топалчыкъ болгъанды. Гемуда бирин ашап тауусхунчу, бирси жанында кырдык чыгъа эди. Ол бир талай заманнга дери шаудандан да иче, кырдыкдан да отлай, алай тургъанды. Ол эки топалчыкъла аны ач этмегендиле. Ол суудан ичгеннге къартлыкъ жетмей эди деп, алай айтадыла. Алай жашай тургъанды да, андан артха Аллах билсин, къалай болгъангды, Гемуда да жокъду алайда. Энди ары чыкъмагъан адам да жокъ. Ол Къарашауай бла Гемуданы ахыр хапарыды.