НАРТЛА! МАЛКЪАР - КЪАРАЧАЙ НАРТ ЭПОС
НАРТЫ! ГЕРОИЧЕСКИЙ ЭПОС БАЛКАРЦЕВ И КАРАЧАЕВЦЕВ

ТЕКСТЫ

IV. ДЕБЕТ — АЛАУГАН — КЪАРАШАУАЙ

Алауган улу Къарашауай Минги тауну башында жашагъанды. Минги тауну айрысында жерни къазып, бир ариу чокъуракъ суу чыгъаргъанды. «Минги тауну ёлмез къара сууу»,— дегенлери олду.

Къарашауай, Минги тауну бузларын бузуп, ууакъ томуруп, башха амалы болмай, буз гыртланы гыржын орнуна ашап, ызындан къара суудан ичип, алай жашагъанды.

Мардасыз кёп жашагъан адамны кёрселе, бюгюн да анга: «Минги тауну сууун ичген болур эди»,— дейдиле. Учуп барып, бюгюн да къанатлыла ёлмез суудан ичип турадыла. Алагъа тауну башына чыкъгъан, адамлагъача, къыйын тюйюлдю да. Ол себепден кёп жашай болурла ала.