Уллу Адилни да кюнлюм жагъасында,
Ой, оймат, оймат а къойнунда, дейле,

Ой, нарт къойчусу да Созук да, дейле,
Ой, нарт къойчусу да Созук да, дейле,

5 Уллу Адилни да кюнлюм жагъасында, дейди,
Къоланбаш къойла да кюте тургъанлай, дейдиле,

Къоланбаш къойла да кюте тургъанлай, дейле,
Акъ ташха олтуруп къарай тургъанлай, дейле,

Ариу Сатанайны да сууну бирси жанында кёргенди, дейле,
10 Ариу Сатанайны да сууну бирси жанында кёргенди, дейле,

Ой, анга сукъланнгандан а ёлгенди, дейле,
Ой, анга сукъланнгандан а ёлгенди, дейле.

Уллу Адилни да кюнлюм а жагъасындан а, дейле,
Уллу Адилни да кюнлюм а жагъасындан а, дейле,

15 Созукну урлугъу да, огъу уа атылды, дейле,
Ол Сатанай олтургъан а состар ташха чачылды, дейле.
Ол Сатанай олтургъан а состар ташха чачылды, дейле,

Къарт Созук да ма алай айтып а къычырды, дейле:

— Эй, бийче, ол состар ташны биргенге алып бар! — дегенди.—
20 Ол состар ташны биргенге алып бар! — дегенди.

Сатанай бийче да къарт къойчуну да айтханын а этгенди, дейле,
Ол состар ташны да юйюне алып а кетгенди, дейле.
Ол состар ташны да юйюне алып а кетгенди, дейле,

Ол таш, таууш эте, къымылдай болгъанды, дейле.
25 Къаратон Сатанайны жюреги да къууанчдан толгъанды, дейле,
Къаратон Сатанайны жюреги да къууанчдан толгъанды, дейле.

Таш тогъуз айны бууаз болуп а тургъанды, дейле,
Таш жарылып а Сосурукъ андан туугъанды, дейле,
Таш жарылып а Сосурукъ андан туугъанды, дейле.