Мен бир жырны айтама,
Жюрегим бек къууанып,
Хар инсан тынгыласын,
Аны хайырын танып.

Николайны чагъында
Инжийелле миллетле.
Арада жюрюйелле
Аман къазжау адетле.

Эрши кёрюп бир бирни,
Тохтамайын урушуп,
Жашайелле ит бла
Бёрю кибик, къуушуп.

Чабаелле ташадан,
Чола кезиу марашып.
Болалмаелле ала
Бир бири бла жарашып.

Жашайелле дунияда
Хыйлачыла мал урлап,
Малтап да кете эди
Онгсузну онглу, хорлап.

Жашайелле барысы,
Къажаулукъдан тыйылмай,
Бир бирине къарамай,
Бир акъылгъа жыйылмай.

Къара халкъны арасында
Быллай хыйла къургъанла,-
Бийле, байла, молала,
Алагъа баш болгъанла.

Ала сюймей эдиле
Халкъны къууум этерин,
Билип къоркъа эдиле
Жашаулары кетерин.

Маркс эди бек алгъа
Къарындаш от тиргизген.
Андан сора ленинди
Аны жолунда келген.

Тюзлюк кюсегенлени
Суусапларын къандыргъаг.
Къарангы миллетлеге
Жарыкъ чыракъ жандыргъан.

Миллетлени ичинде
Къайгъыланы тындыргъан;
Аланы юскюргенлени
Къопмаз кибик сындыргъан!

Жарлыланы бай этип,
Насыпларын онгдургъан.
Бу къыйынлы дунияда
Монглукъ жашау болдургъан!

Жарлыланы бай этип,
Насыпларын онгдургъан.
Бу къыйынлы дунияда
Монглукъ жашау болдургъан!

Маркс – бачама деген,
Аны жолунда келген,
Ленин эди халкъ сюйген,-
Тенгликни жайып ёлген!

Битеу халкъла биригип,
Уллу юйюр болгъанбыз.
Партияны къолунда
Насыплыкъдан толгъанбыз.

1936