Къартлыкъ, сормайын келдинг,
Ким чакъыргъанед сени?
-Соруп къалай келейим,
Кёрюп болмайсыз мени!

-Юйюмю ким кёргюзтдю,
Къалай тапдынг сен аны?
-Мен ажашмай табама,
Кезиу жетсе жолланы.

-Ажашып бираз къалсанг
Не боллукъ эди жолда?
-Угъай, мени ажашып
Инсан кёрмед дунияда!

Манга керек юйлеге
Жолну иги билеме.
Патчахха, факъыргъа да
Мен бир кибик келеме.

Сизнича, къоркъуп, апчып
Къалмайма кючлюледен.
Не эсирген залим да
Къутулмайды менден!

Патчах аскер кючю да
Жетмейд мени жояргъа,
Батырланы къолундан
Келмейд жолда тыяргъа.

-Сен келгенни билсемед,
Эшигими ачмазем.
Сенлай кюйсюз къонакъгъа
Жеримден да къопмазем.

Ишим кёпдю, ишлерге
Къоймазса, къартлыкъ, мени?
Туман кечелей, къара
Этерсе кюнлерими.

Тиш таныгъы къоймайын
Алырса, тюшюрюрсе.
Гулош тыякъны берип,
Арбазда чёкдюрюрсе.

Кечеле узун болуп,
Жукъу кирмез кёзюме,
Чыгъалмайын къалырма
Жарлы эски юйюмден.

Сёз эшитдирмей, сангырау
Этип, алай къоярса.
Бек ахырында манга
Терен къабыр къазарса.

Сени тюрт сууугъунгдан
Ма тёрт саным къурушур.
Къууанма, къартлыкъ, энтда
Назму сёзюм болушур!

Назмуланы жылыуу
Мени бла турлукъду.
Дунияда назмучугъа
Ёлгюнчю къартлыкъ жокъду!

1928