Шауаланы жарлы Керим,
Къыркъылдыла билеклерим,
Сен жолунгдан ёлюп келдинг,
Мудах болду саулай элинг.

Арбазыма оюн къургъан,
Тобугъумда кёп олтургъан,
Китапланы терк окъугъан,
Керимчигим –жигит улан!

Айта турса – ариу тилли,
Иш къураса– сабыр кюйлю,
Орта бойлу, къара шинли, –
Къайда энди сени тенгли!

Баргъан эдинг Къарачайгъа
Окъургъа деп эки-юч айгъа,
Жеришмединг болжал жайгъа,
Ай мубарик, жигит бала!

Къарачай телеграмм ийди,
Тенг къызларынг къара кийди,
Тенг нёгеринг башын тюйдю,
Элге салдынг аман кюйню!

Анангы къойгъанса къартлай,
Ачыудан жюреги чартлай,
Этерге мадарын тапмай, –
Ай мубарик, жигит бала!

Эки эгечинг болалмайла,
Бир сабырлыкъ салалмайла,
Адам сёзюн алалмайла,
Ай мубарик, жигит бала!

Саулугъунгда къарагъанла,
Ёлгенингде жарагъанла, –
Нюржан, Бабух, Сафиятынг,
Этилмеди осуятынг.

Элинги сен артха атдынг,
Хурзукда узунлап жатдынг,
Дуниянгы жашлай сатдынг, –
Ай мубарик, жигит бала!

Гитчеликден окъуп келдинг,
Илмуланы тамам билдинг,
Юйлеринги бек къурадынг,
Ичлеринде нек турмадынг?

Къатын алып, мал жаймадынг,
Мюлк юсюнде жан къоймадынг,
Окъуп келип, юй болмадынг, –
Ай мубарик, жигит бала!

Элинг алай умут этди:
Оярса деп зулму чекни!
Алырса деп эски дертни, –
Ай мубарик, жигит бала!

Чырагъыенг тау миллетни,
Оялмадынг зулму чекни,
Алалмадынг эски дертни, –
Ёлюм сени алып кетди!

1918