Джашагъаным тенгли энтда джашасам,
Суу агъачны джутхан къартха ушасам,
Атларыкъма шалдирлерим къыйыла,
Болгъан къайгъы сер башыма джыйыла.

Балаларым оноууму онгсунмай,
Туудукъларым мен айтханнга бойсунмай,
Мен кишини, киши мени джаратмай,
Хынч-хынч эте, кече джатсам, танг атмай...

«Ой, джюрегим, кемпир, дарман берсенг» — дей,
«Аурумазенг кюндюз эслеб юрсенг» — дей,
Ол да джазыкъ манга къуя табханын,
Дарман излей къармарыкъды табханы.

Танг атса уа, мен гаямы джабалмай,
Гыр-гырыма киши дарман табалмай,
«Бир таянчы» — дей, къатыма джатарла
Туудукъларым, «СЕРгей АППА» атарла.

Къарт киштикча, бир затланы мурулдай,
Бир кесекге къалкъырыкъма хурулдай,
Кебинликге ушаб къартлыкъ юсюмде,
Джашлыгъымы кёре мен а тюшюмде...

1996 дж.