«Да мен анда келишиб
Джашаялмам» — дейсе сен.
«Ичгичиге, динсизге
Ушаялмам!» — дейсе сен.
«Мында балыкъ тенгнзде
Джашагъанча джашайма,
Къоркъмай тамбла кюнюме,
Къыйынымы ашайма!» —
Дейсе, шохум, билмейме...
Тюз болурса кесингча?
«Къайт Джуртунга» — дей эсем,
Тюз болурма кесимча?

Таудан саркъгъан суу таугъа
Булут болуб къайтады,
Тауда джерин табмаса,
Тенгиз таба саркъады.
Туралмасанг Джуртунгда,
Аны ачыкъ айтырса.
Джангур тамчы тенгизге
Къайтхан кибик къайтырса.
Къоркъмай Баба Джуртунга
Къайт да бир кёр, таулу эр,
Будайны урлугъуна
Къабыр тюлдю къара джер!

1992 дж.