Ёз болумун адам къалай билмейди?
Кескин джууаб табалмайма соруугъа.
Ол сорууну хазна киши сюймейди,
Мен билмейме джууаб кимден сорургъа.

Мен кесим да джангылгъанма кёб кере,
Эшегими къошуб чабхан атлагъа.
Къыркъгъа джете, заман меннге дере бере,
Кюрешеме болумумча атларгъа.

Болумундан эсе, адам къаллай бир
Артыкъ сыйны излей эсе кесине,
Акъылыны джетмегени аллай бир
Болады — деб, бюгюн келди эсиме.

Бу оюм да хазна себеб бермейди,
(Хош болурем, ол бир джаннга джараса)
Баймакълыгъын баймакъ къалай кёрмейди,
Чурукъларын тешиб, эслеб къараса?!

1995 дж.